آئی سی سی چیمپیئنز ٹرافی نا فائنل اٹی بھارت ئِ کٹنگ آن پد پاکستانی قومی ٹیم انا گوازی گر تا وطن آ پدی سرمننگ آ لاہور، کراچی، راولپنڈی ، پشاور ایئر پورٹ آتیا حکومتی عہدیدار ، ضلعی انتطامیہ وکرکٹ نا شونکی تا کنڈآن والہانہ بیابخیر، پولیس گارڈ آف آنر پیش کرے

لاہور۔ 20 جون (اے پی پی) آئی سی سی چیمپیئنز ٹرافی کرکٹ ٹورنامنٹ نا فائنل اٹی بھارت ئِ باترفوک آ قومی ٹیم انا گوازی گر چندی فلائٹ آتا کمک اٹ لاہور، کراچی ، راولپنڈی، پشاور و سیالکوٹ آ سرمسر۔ سرجم احوال آتارداٹ احمد شہزاد، بابر اعظم ، فہیم اشرف، حسن علی، پی سی بی عہدیدار شاہد اسلم، میجر اظہر و رضا راشد لاہور آ سرمسر، کیپٹن سرفراز احمد و رومان رئیس چیمپیئنز ٹرافی تون اوار کراچی آ سرمسر، شاداب و عماد وسیم راولپنڈی، حارث سہیل سیالکوٹ و فخرزمان پشاورآ سرمسر وخت اس کہ قومی ٹیم انا ایلو باسک محمد عامر، جنید خان، محمد حفیظ ، شعیب ملک، اظہر لندن اٹی منہ دے اڈکننگ آن پد وطن آ پدی بریرہ۔ غٹ گوازی گر تا تعلقدار ایئر پورٹ آتیا حکومتی عہدیدار ، ضلعی انتطامیہ نا باسک و کرکٹ نا شونکیک والہانہ اوفتے بخیرکریر۔ علامہ اقبال انٹرنیشنل ایئر پورٹ آ صوبائی وزراءرانا مشہود، جہانگیر خانزادہ، علی رضا گیلانی ، مجتبی شجاع الرحمان، میئر لاہور کرنل (ر) مبشر ، ضلی انتظامیہ ، پی سی بی عہدیدار، کرکٹرز آتا خاہوت و کرکٹ نا شونکیک گوازی گر آتا والہانہ ریڈکارپٹ بخیر کریر۔ اوفتے پھل آتا ہار شاغار، صوبائی وزیر آک اوفتے پھل آتا گلدستہ ہم پیش کریر و پنجاب پولیس نا ورناک اوفتے گارڈ آف آنر پیش کریر۔