اسلام آباد۔20دسمبر (اے پی پی): ادارکی بنجاھی وزیر اھوالکاری، شنگ کاری پارلیمانی کار مرتضیٰ سولنگی ءِ سروکی ءَ سندھی زبان ءِ نامداریں شاعر شیخ ایاز ءِ 100 سدھمی سالروچ ءِ درگت ءَ برجم دارگ ءِ واستہ چار ءُ تپاسی دیوان ءِ چار شمبے ءَ بست ءُ بند کنگ بوت۔ دیوان ءَ ادارکی بنجاھی وزیر دود ءُ ربیدگ ءُ راجی مڈی جمال شاہ، ادارکی بنجاھی وزیر وانگ ءُ زانگ ءُ کزبی کار ءُ ھیل کری مدد علی سندھی ھم شریک ات۔ دیوان ءَ ھیال آنی درشان ءَ کنان ءَ ادارکی بنجاھی وزیر اھوالکاری ءَ گوشت کہ شیخ ایاز جدید سندھی شاعری ءِ درستاں چہ مستریں شاعر ءُ لبزانکار بوتگ۔ شیخ ایاز ءَ وتی شاعری ءِ بنگیج اردو شاعری ءَ چہ کتگ ءُ پد ءَسندھی شاعری ءَ ٹوھ تریں ھند در جتگ۔ ادارکی بنجاھی وزیر دود ءُ ربیدگ ءُ راجی مڈی جمال شاہ ءَ گوشت کہ شیخ ایاز ءَ سندھی شاعری ءُ لبزانک ءَ نوکیں تپ ءُ میل پجار کنائینتگ۔ آ ناں ایوک ءَ سندھ بلکینگ ءَ برصغیر ءِ نامداریں شاعر ات۔ ادارکی بنجاھی وزیر وانگ ءُ زانگ ءُ ھیل کاری مدد علی سندھی ءَ گوشتگ کہ شیخ ایاز ءِ شاعری ءَ ابید نوکیں سندھ ءِ سسا بوت نہ کنت، شیخ ایاز وتی زمانگ ءِ رھشونیں شاعر بوتگ۔ آئی ءِ شمار لیجنڈز آنی تہ ءَ بیت آئی ءِ زندمان ءِ سر ءَ زانت ءُ زانشی ءُ لبزانکی سسا ساچ آنی سر ءَ کار ءِ بنگیج کنگ بوتگ۔
