واشنگٹن ۔20دسمبر (اے پی پی):پاک فوج ءِ سروکی جنرل سید عاصم منیر ءَ گشتگ کہ پاکستان جغرافیائی سیاسی ء ُ جیواکنامک دوئیں حساب ءَ چہ یک حاسیں ملک اِت ء ُ آ وت ءَ را نزیکی ءِ بُنجاہ ء ُ نیامی ایشیا ء ُ ایشی ءَ چہ دیمءِ ھاترءَ گیٹ وے ءِ ردءَ دیمروئی دیئگ لوٹ ایت، بلے پاکستان بلاک پالیٹکس ءِ سرءَ اوست نہ کنت، درائیں ملک آنی گوما ہم کچ ایں سیادی دارگ ءِ سرءَ اوست کنت۔ پاکستان دراج بُرایں سیادی ءِ وسیلگءَ چہ امریکہ ءِ گوما محکمیں نزیکی گیش کنگءِ وائشت مند اِنت۔ اے گپ ءِ درشانی آئیءَ آئی ایس پی آرءِ نیمگءَ چہ شنگ بوتگیں پریس ریلیز ءِ ردءَ واشنگٹن ءَ نامداریں امریکی تھنک ٹینکس ء ُ میڈیا ءِ باسکانی گوما یک گندء ُ نندءِ تہا گپء ُتران کنان ءَ کتگ۔ اے موہءَ آرمی چیف ءَ کشمیرءِ جیڑہ ءَ را یک من اِتگیں جیڑہے لیک اِتگ ء ُ آئی ءَ را کشمیری اُلس ءِ واہگانی ء ُ اقوام متحدہ ءِ تپاک نامہ آنی ردءَ گیشء ُ گیوار کنگءِ ضلورتءِ سرءَ پرداتگ ء ُ گشتگ کہ کسے ءِ ہم یک نیمگی گامگیج کشمیری اُلس ءِ وائشتانی حلاپ ءَ اے جیڑہ ءِ دروشم ءَ مٹ کُت نہ کنت۔ آرمی چیف ءَ غزہ ءَ انسانی ہمدردی ءِ بنیاتءَ زوتاں چہ زوت جنگ بند کنگءِ سرءَ زور پر داتگء ُ گشتگ کہ اے خطہ ءَ پائیداریں امنء ُ ایمنی ءِ ھاترءَ دوریاستی گیشء ُ گیواری المی اِنت۔ پاک فوج ءِ سروک ءَ گیش گشتگ کہ پاکستان بازیں سالاں چہ ناشرکار ی ءِ حلاپءَ یک رکینوک اِت، دمگی محکمی ء ُ میاں اوستمانی امنء ُ ایمنی ءَ را الم کتگ۔ پاکستان ءَ ناشرکاری ءِ حلاپ ءِ جنگءَ باز بے مٹیں قربانی داتگ ء ُ پاکستان ناشرکاری ءِ حلاپ ءَ تاں آئی ءِ ہلاسی ءَ جنگ کنت۔
