اسلام آباد۔ 15 دسمبر(اے پی پی) نگران بنجائی وزیر داخلہ و انسداد منشیات سرفراز احمد بگٹی اینٹی نارکوٹکس فورس اکیڈمی نا دورہ ءِ کرے و اینٹی نارکوٹکس فورس اکیڈمی ٹی فارنزک لیب انا بناءِ کرے۔ سیکرٹری وزارت انسداد منشیات منیر اعظم و ڈائریکٹر جنرل اینٹی نارکوٹکس فورس میجر جنرل محمد انیق الرحمان ملک بنجائی وزیر ءِ بخیرکرے۔ داوخت آ وزیر داخلہ ءِ اینٹی نارکوٹکس فورس اکیڈمی و فارنزک لیب آ کمانڈنٹ اکیڈمی نا کنڈآن سرجمی اٹ حوال تننگا۔ نگران بنجائی وزیر سرفراز احمد بگٹی اینٹی نارکوٹکس فورس اکیڈمی ٹی فارنزک لیب انا جوڑ کننگ ءِ ستاکڑزوک گوندسا پارے کہ دالیب انا جوڑ کننگ اٹ حکومت چین نا کمکاری آ منت وار اُن۔ دالیب انا جوڑ کننگ آن انسداد منشیات نا بابت چندی ٹیسٹ و رپورٹ آتا جاری کننگ اٹ آسانی ودی مریک، ہراڑآن ڈوہدار آتے اوفتے اوفتا کروک نا سزا تننگ اٹ کمک رسینگک، داڑتون اوار اوار نہادی وخت انا بچت مریک، و ڈیٹا ءِ یکتا کننگک۔ اوپارے کہ منشیات ، دہشت گردی آنبار اسہ بھلو چیلنج اسے ، داناسور ننا ورناچین ءِ بھس کننگ اٹ لگوک ءِ۔ دا مکروہ دھندہ ٹی اوار غٹ بندغ آتے سخت ترین ایکشن ءِ پک کروئی مریک، پاکستان نا روشنا آخبت کن ننے تینا بروک آ چین تے نشہ نا لعنت آن بچفوئی مریک، دا رداٹ اینٹی نارکوٹکس فورس ءِ ہرممکن کمک فراوا ن کینہ۔
