لاہور۔ 15 دسمبر (اے پی پی) صدر مملکت ڈاکٹر عارف علوی نا اُرائی و خاتون اول بیگم ثمینہ عارف علوی جمعہ نادے آ شالامار باغ لاہور نا دورہ ءِ کرے و تاریخی میرات نا رکھ اکن حکومت پنجاب نا کوشست آتا ستا ءِ کرے۔ شالامارباغ آ سرمننگ آ خاتون اول ثمینہ عارف علوی ءِ بخیر ڈائریکٹر جنرل والڈ سٹی آف لاہور اتھارٹی کامران لاشاری و امچور گارڈنرز کلب نا چیئرپرسن نوشین سرفراز ئسک کریر و اودے بخیراٹ پاریر۔ امچور گارڈنرز نا چیئرپرسن نوشین سرفراز داوخت آ خاتون اول ءِ شالامارباغ اٹی درخت و نیال و پھل آتا بارواٹی جاری مروک کاریم تا سرجم حوال آتیان معلومدار کرے۔ ڈائریکٹر جنرل والڈ سٹی آف لاہور اتھارٹی کامران لاشاری خاتون اول ءِ شالامارباغ نا تزئین وآرائش و رکھ انا بابت برجاکاریم تا بارواٹی حوال تس۔ بیگم ثمینہ عارف علوی آثار قدیمہ نا میرات نا رکھ اکن صوبائی حکومت و والڈسٹی آف لاہور نا کوشست آتا ستاءِ کرے و دیکھ بھال نا اعتبار اٹ شالامارباغ نا انتظامیہ نا ستاءِ کرے وپارے کہ حکومت دودوربیدہ ئی میرات نا رکھ اکن غٹ ممکن وسیلہ غاتے کاریم اٹ اتنگ ءِ ۔ اوکان پد خاتون اول بیگم ثمینہ عارف علوی شالامارباغ نا چندی بشخ آتا دورہ ءِ کرے، ایسر اٹ ڈائریکٹر جنرل والڈ سٹی آف لاہور اتھارٹی کامران لاشاری خاتون اول بیگم ثمینہ عارف علوی ءِ شیلڈ اس پیش کرے۔
