اسلام آباد۔ 15 دسمبر (اے پی پی) وزارت مذہبی امور ءِ ریگولر و سپانسر شپ حج اسکیم نا رداٹ جم وڑاٹ 56 ہزار724 درخواست دوئی مسنے، حج درخواست آتے 22 دسمبرا سکان قومی بینک آتا مجاز شاخ تیٹی جمع کرفنگ مریک۔ جمعہ نادے آ وزارت مذہبی امور نا کنڈآن تروک آ حساب وکتاب نا رداٹ 14 دسمبر اسکان قومی بینک آتیٹی ریگولر اسکیم نا رداٹ 54 ہزار 164 و سپانسر شپ اسکیم نا رداٹ 2560 درخواست دوئی مسنے۔ یات سلے کہ برجاسال پاکستان نا حج کوٹہ اسہ لکھ 79 ہزار 210 ءِ ہرافتیان نیمہ کچ ریگولر و سپانسر شپ اسکیم نا رداٹ و نیمہ پرائیویٹ حج اسکیم کن مقرر کننگانے۔ ریگولر و سپانسر شپ اسکیم نا رداٹ ریگولر اسکیم کن 63 ہزار 805 وخت اس کہ سپانسر شپ اسکیم نا رداٹ 25 ہزار نا کوٹہ مقرر ءِ۔ سپانسر شپ اسکیم نا رداٹ اول ببو اول دبو نا بنداو آ بیدس قرعہ اندازی نا درخواست گزار سرسہب گوندنگک وخت اس کہ ریگولر اسکیم نا رداٹ مقررہ کچ آن گدرینگوک آ درخواست آتا دروشم اٹ قرعہ اندازی مریک۔
