اسلام آباد۔ 15 دسمبر (اے پی پی) ملک اٹی جم درملکی زرکاری ٹی برجامالی سال انا اولیکو چار تُو اٹی سالانہ بنداو تیا 17.8 درسد و براہ راست درملکی زرکاری ٹی 7.1 درسد نا نموریکارڈ کننگانے۔ زرکاری بورڈ و وزارت خزانہ نا حساب وکتاب نا رداٹ جولائی آن اکتوبر اسکان نا مد اٹی ملک اٹی 538.8 ملین ڈالر نا جم درملکی زرکاری ریکارڈ کننگا ہرا تدوک آ مالی سال انا ہندا مد انا مقابلہ ٹی 17.8 درسد زیات ءُ، تدوک آ مالی سال انا ہند امد اٹی ملک اٹی جم درملکی زرکاری نا کچ 457.3 ملین ڈالر ریکارڈ کننگاسس۔ ہندا وڑ برجامالی سال انا اولیکو چار تُو اٹی ملک اٹی براہ راست درملکی زرکاری نا کچ 524.7ملین ڈالر ریکارڈ کننگا ہرا تدوک آ مالی سال انا ہند امدانا مقابلہ ٹی 7.1 درسد زیات ءُ۔ تدوک آ مالی سال انا ہندا مد اٹی ملک اٹی 489.9 ملین ڈالر نا براہ راست درملکی زرکاری ریکارڈ کننگاسس۔ حساب وکتاب نا رداٹ مالی سال انا اولیکو سہ ماہی (جولائی آن ستمبر2023) اٹی پاکستان اٹ تیل و گیس انا بشخ اٹی 65 ملین ڈالر، تعمیرات نا بشخ اٹی 7.1 ملین ڈالر، توانائی نا بشخ اٹی 199.7 ملین ڈالر، کیمیکلز نا بشخ اٹی 6.0 ملین ڈالر، ٹرانسپورٹ نا بشخ اٹی 4.2 ملین ڈالر، مالیاتی بزنس نا بشخ اٹی 44.2 ملین ڈالر، واپار نا بشخ اٹی 5.8 ملین ڈالر و ایلو بشخ آتیٹی118.5 ملین ڈالر ریکارڈ کننگا۔
