پشاور۔ 15 دسمبر (اے پی پی) ٹانک اٹی پولیس لائن آ دہشت گرد آتا جلہو اٹی 2 پولیس کارندہ شہید وخت اس کہ 2 ٹھپی مسر۔ ڈسٹرکٹ پولیس آفیسر (ڈی پی او) ٹانک افتخار شاہ پولیس کارندہ غاتا شہید و ٹھپی مننگ ءِ پک کرینے۔ ڈی پی او پارےے کہ اسہ دہشت گرد اس تینے تینٹ ترخفے۔ پولیس لین اٹی ساڑی غٹ نفری ءِ بحفاظت کشنگا، پین دہشت گرد آتا حوال آ سرچ آپریشن برجاءِ۔ پولیس کمامدارآک پاریر کہ دہشت گرد آک جلہو نن نا 3 بجہ نا خڑک کریر اوکان پد ڈیرہ روڈ ءِ ٹریفک کن بند کننگا و دہشت گرد آتے ہلنگ کن علاقہ ٹی سرچ آپریشن برجاءِ۔
