کوئٹہ۔15 دسمبر(اے پی پی) پاکستان مسلم لیگ (ن) بلوچستان نا سینئر راہشون چوہدری نعیم کریم پارینے کہ بھارتی سپریم کورٹ انا مقبوضہ کشمیر نا خصوصی حیثیت ءِ چٹفنگ نا مودی سرکار نا گام ءِ برقرار تخنگ اسہ معتصبانہ و ناانصافی آ تالان فیصلہ اسے، ہرا کشمیری و پاکستان ءِ ہچ وڑ اسے ٹی قابل قبول اف۔ کوئٹہ غان جاری مروک آ اسہ بیان اسے ٹی چوہدری نعیم کریم پارے کہ بھارتی سپریم کورٹ انا مقبوضہ جموں و کشمیر نا خصوصی حیثیت ءِ بحال کننگ نا بابت درخواست آتے مسترد کننگ وآرٹیکل 370 ءِ منسوخ کننگ نا مودی سرکار نا 5 اگست 2019 نا فیصلہ ءِ برقرار تخنگ و جموں و کشمیر نا مخلوق ءِ اوفتا حق خودارادیت آن محروم کننگ ءِ فریب گوندسا پارینے کہ مقبوضہ جموں و کشمیر جہانی کہول آ امنا مروک اسہ جھیڑہ ئی علاقہ سے ہرانا گڈیکو فیصلہ ءِ اقوام متحدہ نا سلامتی کونسل نا قرارداد آتا رداٹ و کشمیری الس نا است خواہی تا رداٹ مننگ ءِ۔ اوپارے کہ پین عمل اس کشمیری الس ناحق خودارادیت نا متبادل مننگ کپک۔ 5 اگست 2019 نا بھارت نا اسہ کنڈی و غیرکانودی گام گیج و اوکان پد انا چندی گام گیج آتا مسخت بھارت نا غیر قانودی وڑاٹ کوزہ ٹی جموں و کشمیر نق آبادیاتی پنجر و سیاسی منظر نامہ ءِ بدل کننگ ءِ، نن دا گام گیج آتاترندی اٹ مذمت ءِ کینہ و اودے مسترد کینہ۔ اوپارے کہ کشمیر ءِ بھارت نا بشخ نئے مہالو منانہ نئے آخبت مننہ۔ انشاءاللہ پاکستان نا الس تینا کشمیری ایلم تا کشمیر نا آجوئی نا جہد ءِ برجا تخنگ نا مخ تفی ءِ برجا تخنہ و کشمیری الس الحاق پاکستان نا داعی ءِ، انشاءاللہ او دا مزل ءِ ہر حال اٹ دوئی کیرہ۔
