کوئٹہ۔15 دسمبر(اے پی پی)پاکستان مسلم لیگ (ن) بلوچستان نا راہشون فاطمہ خان پارینے کہ (ن) لیگ السی خذمت نا سیاست کروک آجماعت ءِ پارٹی مدام الس نا شونداری و شونہالی کن انقلابی گام گیج کرے، لس گچین کاری تیٹی مسلم لیگ (ن) انشاء اللہ بھلو گیشتری اسے اٹ بلوچستان تون اوار ہر چار آ صوبہ غاتیٹی سرسہبی دوئی کیک۔ زالبول آک ملک انا شونداری ٹی تمبہ نا حیثیت تخرہ، مسلم لیگ (ن) مدام زالبول آتا شونداری و شونہالی کن گام گیج کرینے۔ داہیت ءِ او جمعہ نادے آ شاہ زمان روڈ آ کارنر میٹنگ آن تران کرسا پارے۔ فاطمہ خان پارے کہ مسلم لیگ (ن) حقی وڑاٹ السی خذمت نا سیاست کروک آ جماعت ءِ، مسلم لیگ (ن) مدام تینا دور ءِ حکومت اٹ مزور، خواری کش، بزغر، کشارگر ، ورنا، طالب علم آتا زند اٹی شونداری و شونہالی اتنگ کن تاریخی انقلابی گام گیج کرساملک انا نیزگار خواری کش الس ناخذمت نا درور قائم کرینے۔ اوپارے کہ تہوتا رخ پاننگ ءِ آخبت بلوچستان تون اوار ہر چا ر آ صوبہ و بنجاٹی حکومت مسلم لیگ (ن) نا مریک، قائد نواز شریف نا ایجنڈا پاکستان ءِ دنیا نا ٹائیگر جوڑ کننگ ءِ ہرا پاکستان مخالف آتے اسہ وڑتفک۔ اوپارے کہ زالبول آک ملک انا آبادی نا نیمہ بشخ ءُ زالبول آک مسلم لیگ (ن) نا اومیتدار آتے وونٹ ترسا سرسہب کیر انشاء اللہ مسلم لیگ (ن) نا اومیتدار اوفتے مایوس کپک۔ اوپارے کہ مسلم لیگ (ن) برسر اقتدار برسا زالبول آتا شونداری وشونہالی کن اولیتی بنداوتیا گام گیج کیک۔ اوپارے کہ زالبول آک بروک آ لس گچین کاری تیٹی پارٹی نا سرسہبی کن ہراُراغا ہنسا پارٹی نا قائد نا کلہو ءِ سرکیر۔
