کوئٹہ۔ 15 دسمبر (اے پی پی) چیئرمین اسٹینڈنگ کمیٹی پیٹرولیم و رسورسز و سیاسی و اقتصادی امور نا ماہر سینیٹر محمد عبدالقادر پارینے کہ پاکستان اسہ ایٹمی طاقت اسے پاکستان نا صلح جوئی ءِ اونا نزوری تکنگپ، پاکستان سیکورٹی فورس آتا چاک و چوبند و مستعد دستہ غاک پاک اوغان طورخم بارڈر آ اوغانستان آن پاکستان سلہہ اسمگل کننگ نا کوشست ءِ بے سہب کرینو ، پوسکن آ امریکی سلہہ اوغانستان آن پاکستان بروک آ دا ٹرک آتیٹی اودیم کننگاسس، ہرافتے ٹی پیماز نا گونیک پُرئسر، دا ہموسلہہ غاک ئسر ہرا امریکی فوج اگست 2021اٹی اوغانستان آن کشنگ نا وخت اوغانستان اٹی ہلاسر ہناسر۔ داڑے جاری مروک اسہ بیان اسے ٹی سینیٹر محمد عبدالقادر پارے کہ دا خطرناک آتشی سلہہ غاک پاکستان اٹ دہشت گرد آتے گدریفنگارہ اگہ وڑانا وڑاسے ٹی داسلہہ غاک دہشت گرد آتا دوٹی لگارہ تو پاکستان اٹ بھلو کچ اسے آ بھسکاری تالان کننگ نا سوب جوڑ مسرہ اگست 2021اٹی امریکہ نا اوغانستان اٹی بھلو کچ اسے ٹی ہلوک آ سلہہ غاتے اوغان طالبان و اوفتا پراکسی تحریک طالبان پاکستان آ سرمسر، اوغان طالبان تیان بیدس پین اسٹ نا دُوآ سلہہ غاتا لگنگ مچ آ ڈیہہ اکن بے کچ تشویشناک ہیت اسے۔ اوپارے کہ پاکستان اٹ مروک آ دہشت گردی نا چندی واقعہ غاتیٹی دہشت گرد آتیان ہراسلہہ غاتے ہلنگانے او ہمو امریکی سلہہ غاک ءُ پاکستان اٹ مروک آ چندی دہشت گرد کارروائی تیان پد پاکستان وا ر وار اوغان طالبان تون برانز کرے و پارے کہ او دا غٹ دہشت گرد آتا برخلاف کارروائی کے ہرا پاکستان اٹ مروک آ دہشت گردی ٹی اوار خننگانو ولے اوغان طالبان داوڑنا کارروائی تیان گریز کرے اوغان طالبان ءِ دہشت گرد آتا برخلاف کارروائی کروئی مریک ورنہ پاکستان تینا دفاع نا حق ءِ محفوظ تخک۔
