مظفرآباد۔ 14 دسمبر (اے پی پی) نگران وزیراعظم انوارالحق کاکڑ پارینے کہ بھارت نا غیرکانودی گام گیج آتیان کشمیری تا جہد آجوئی بدل مفک بلکن پین سوگو مریک، پاکستانی تا است تینا کشمیری ایڑھ و ایلم تتون اوار سُرک۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او آزاد کشمیر نا وزیراعظم چوہدری انوارالحق و کانود ساز اسمبلی نا اسپیکر چوہدری لطیف اکبر تون گپ وتران کرسا کرے ہرا پنچ شنبے نادے آ کانود ساز اسمبلی نا اسپیکر چیمبر اٹی اوڑتون اوڑدہی کرے۔ وزیراعظم آزاد کشمیر وزیراعظم انوارالحق کاکڑ ءِ آزاد کشمیر آ بننگ آ بخیر اٹ پارے۔ وزیراعظم آزاد کشمیر و اسپیکر کانود سازا سمبلی بھارتی سپریم کورٹ نا فیصلہ غان پد جموں وکشمیر نا الس تون یکجہتی نا درشانی آ وزیراعظم انوارالحق کاکڑ نا منت وار ی ءِ ہرفے۔ داوخت آ نگران وزیراعظم انوارالحق کاکڑ پارے کہ پاکستانی تا است تینا کشمیری ایڑھ و ایلم تتون اوار سُرک۔ اوپارے کہ بھارت نا غیرکانودی گام گیج آتیان کشمیری تا جہد آجوئی بدل مفک بلکن پین سوگو مریک ۔
