اسلام آباد۔ 14 دسمبر (اے پی پی) پاکستان اٹ عراق نا سفیر حامد عباس لفتہ پنچ شنبے نادے آ وزیرمذہبی امور انیق احمد تون وزارت مذہبی امور اٹی اوڑدہی کرے۔ ہڑتوم آ راہشونک ہڑتوم آکنڈآتا تعلقداری، مذہبی سیل و سوات و دودوربیدہ نا بشخ اٹی کمکاری ءِ ودفنگ نا بابت گپ وتران کریر۔ بنجائی وزیرمذہبی امور انیق احمد عراق ناسفیر تون گپ وتران کرسا پارے کہ عراق تون پاکستان نا متکن آ ایلمی تعلقداری ءِ۔ عراق و پاکستان نا الس اٹ عقیدت، مہرومریبت و اخلاص نا رشتہ ءِ۔ مذہبی سیل و سوات نا مون آ دننگ و زائر آتا آسراتی ءِ مون آتخسا زیارت پالیسی اس جوڑ کننگانے ہراٹی زیارات کرفوک آ نجی کمپنی تے حکومتی کہول آرجسٹرڈ کننگک۔ عراقی سفیر حامد عباس لفتہ زائر آتے گچین آسراتی تا فراوانی نا عزم انا درشانی ءِ کرسا پارے کہ پاکستانی زائر آتا ویزہ غاتا جاری و آسراتی تیکن سفارت خانہ عراقی وزارت داخلہ و خارجہ امور تون پورو رابطہ ٹی مریک۔ اوڑدہی ٹی بغداد و کربلا ٹی زائر آتا آسراتی کن پاکستان ہاؤس نا تفنگ نا بارواٹی سرجمی اٹ گپ وتران کننگا۔
