اسلام آباد۔ 13 دسمبر (اے پی پی) صدر مملکت ڈاکٹر عارف علوی سازگار چاگڑد و گچین آسراتی تا فراوانی ءِ گوازی و سیل وسوات نا شونداری کن اہم گوندسا پارینے کہ پاکستان اٹ گوازی و ایڈونچرٹورازم نا بے پناہ گمان ساڑی ءِ، گچین ضابطہ و گچین انفراسٹرکچر نا کمک اٹ سیل و سوات نا بشخ ءِ مون آ دننگ مریک۔ داخیال آتا درشانی ءِ او چارشنبے نادے آ داڑے ایوان صدر اٹی مسٹ میکو پائیدار ماؤنٹین اسپورٹس ٹورازم کانفرنس نا ایسری دود آن تران کرساکرے۔ ’’ریوائیول آف ماؤنٹین گلوری‘‘ نا سرحال آن مروک آ دود انا بست وبند ءِ الپائن کلب آف پاکستان کریسس۔ دود اٹی ثمینہ بیگ، نائلہ کیانی وساجد سدپارہ تون اوار ملک انا پنی آ کوہ پیماک ہم بشخ ہلکر ہرافک دنیا نا بڑزکو چوٹی تے سرکرسا ٹائٹل ءِ کٹنگ نااعزاز ءِ دوئی کرینو۔ صدر مملکت پارے کہ قدرت پاکستان ءِ ناقابل یقین حد اسکان پرسکون حسن تسنے خاص وڑاٹ ملک انا قطبی علاقہ ہراڑے مش و برفیلی چوٹی سیل و سوات و ٹریکر آتیکن کشش نا اسہ بھلو ذریعہ اسے۔
