اسلام آباد۔ 12 دسمبر (اے پی پی) صدر مملکت ڈاکٹر عارف علوی ٹیکنالوجی نا کاریم اٹ اتنگ نا کمک اٹ خصوصی بندغ آتیکن آسانی ودی کننگ نا گرج آ زور شاغسا پارینے کہ بصارت آن محروم بندغ آتیکن وزارت جان جوڑی اہم کڑد ادا کننگ کیک، فنی تربیت ترساخصوصی بندغ آتے راج انا مفید باسک جوڑ کننگ مریک ۔ صدر مملکت داخیال آتا درشانی ءِ سے شنبے نادے آ داڑے ایوان صدر اٹ بصارت آن محروم بندغ آتیکن مراکش ٹریٹی آ دستخط نا دود آن تران کرسا کرے۔ اوشاری تیا زور شاغا کہ او بصارت آن محروم بندغ آتون اوار خصوصی بندغ آتا راجی آسودہی کن تینا کڑد ءِ ادا کیر، و دا چرجوئی ٹی راج اٹ تینا مثبت زمواری تےپورو کیر۔ صدر مملکت پارے کہ نادرا و وزارت انسانی حق خصوصی بندغ آتے گچین خذمت فراوان کننگ ءُ۔ اوپارے کہ بصارت آن محروم بندغ آتیکن معاہدہ بھاز درگہ ملک، است خواہی ءِ کہ بصارت آن محروم بندغ آتیکن آسراتی مدام سلے۔ صدر مملکت پارے کہ مراکش اتون معاہدہ ننکن خوشی نا سوب ءِ۔ صدر پارے کہ بصارت آن محروم بندغ آتیکن خصوصی چشمہ اس جوڑ کننگانے، چشمہ نابیا بندغ آتیکن ٹیکسٹ خواننگ و بندغ آتے درست کننگ کیک۔ ڈاکٹر عارف علوی پارے کہ خصوصی بندغ آتے تعلیم تروک آ استاد آتے تربیت تننگ انگ ءِ، معذور و خصوصی بندغ آتے راج اٹ آسانی کننگ تون اوار اوار اوفتے کن وارخواہی ودی کننگ نا کوشست کننگے۔ اوپارے کہ خصوصی بندغ خاص وڑاٹ بصارت آن محروم بندغ آتا بارواٹی شعور تالان کننگ کن اجتماعی کوشست آتا گرج ءِ ، داڑتون اوار اوار اوفتے سکل سیٹس تننگ و روزگار اٹی وارخواہی تننگ نا گرج ءِ، فنی تربیت ترسا خصوصی بندغ آتے راج انا مفید باسک جوڑ کننگ مریک۔
