اسلام آباد۔ 12 دسمبر (اے پی پی) نگران بنجائی وزیر توانائی محمد علی پارینے کہ ملکی گرج انا رداٹ کھد درآمد کننگانے ، یوریا کھد انا پیدوار ءِ زیات آن زیات ودفنگک، برجاسال یخ انا موسم اٹی کھد اناہچ ءُ پلانٹ اسے بند کننگپک۔ سے شنبے نادے آ داڑے بنجائی وزیر داخلہ سرفراز بگٹی و بنجائی وزیر حوالکاری و شینکاری تون اوار پریس کانفرنس آن تران کرسا اوپارےکہ مستین اٹ ننے گڑاس کھد پلانٹ آتے یخ آتیٹی گیس انا کمتی نا سو ب آن بند کروئی تماکہ۔ داسال نن فیصلہ کرینن کہ اسہ پلانٹ اس ہم بند مفک و مچ آ یخ انا موسم اٹی پورو لائخی نارداٹ دا پلانٹ آتے چلیفنگک۔ فاطمہ فرٹیلائزر و ایگری ٹیک ءِ مستین اٹ اِر امسہ تُو اکن بند کننگاکہ۔ داسہ اوفتے ہم بند کننگپک۔ مچ آ پلانٹ پورو چلینگ انگ ءُ و دسمبر جنوری، فروری و مارچ اٹی غٹ پلانٹ آک چلینگرہ۔ داڑآن ہندی پیدوار اٹی ودکی مریک، یوریاکھد انا گرج اکن درآمد کننگ انگ ءِ ، غٹ کھد کمپنی تتون نن رابطہ ٹی اُن۔ مڈل مین حالیت آتیان فائدہ ہرفنگ ءُ، ہراسپلائی بننگ ءِ و پلانٹ آتا چلیفنگ نا نن ہرافیصلہ ءِ کرینن ، اوڑآن سپلائی بھاز جوان مریک۔ ایل این جی خواہفنگ نا سوب آن کھد انا کارخانہ غاتے گیس سپلائی کننگ انگ ءِ۔ اوپارے کہ گیس کمپنیک گیس دُزی نا توننگ کن کارروائی کرسا کیرہ ۔ ملک اٹی گیس انا سپلائی ٹی 8آن 9 درسد کمتی مسنے و دادے پورو کننگ کن ایل این جی درآمد کینہ۔ ننے ایل پی جی نا مچ آ انفراسٹرکچر ءِ گچین کروئی مریک۔ ایل پی جی نا پورو پلان اس جوڑ کننگ انگ ءِ و دانا ہندی پیدوار اٹی ہم ودکی کروئی مریک۔ ملک اٹی گیس انا کوڑی ساڑی ءِ۔ ننے دافتیان پیدوار دوئی کننگ کن گام گیج کروئی مریک۔ گیس انا بشخ انا گردشی وامک ودانو و پیشن والا کمپنیک ملک ءِ اِلانوہنانو، نن پین 100 ایم ایم سی ایف ڈی گیس سسٹم اٹ اتنگ نا کوشست کننگ اُن، پالیسی تیٹی بدلی تیاہم کاریم کننگ اُن۔
