اسلام آباد۔ 12 دسمبر (اے پی پی) نگران بنجائی وزیر داخلہ میر سرفراز احمد بگٹی پارینے کہ کھد انا نہاد آتیٹی ودکی و خودساختہ کمتی کوڑی کروک آتا سوب آن مسنے، یوریاکھد انا بابت مصنوعی تنکی ودی کننگ انگ ءِ، داناتوننگ اٹ غٹ چیف سیکرٹری و آئی جی تے دا مافیا تا برخلاف کارروائی کننگ کن 24 گھنٹہ نا وخت تننگانے، مستین نا اسہ حکمران اس دہشت گرد آتے ’’فری رن‘‘ فراوان کرے ہرانا سوب آن ملک اٹی دُوارہ دہشت گردی مننگ ءِ۔ اوسے شنبے نادے آ نگران بنجائی وزیر مرتضیٰ سولنگی، محمد علی تون اوار پریس کانفرنس آن تران کریکہ۔ وزیرداخلہ سرفراز احمد بگٹی پارے کہ کھد انا کمتی و نہاد آتیٹی ودکی آ وزیراعظم نوٹس ہلک و داڑآ دیوان مس و دنن اسکان نن داڑآ سلابت کرسا کرین تو نتیجہ دامون آ بس کہ ملک اٹی کھد انا ہچ ءُ کمتی اس اف، وخت وخت اس ہی داوڑمسکہ کہ ٹیکنیکل فالٹ یا گیس انا ویل انا سوب آن پیدوار زہمی مریک۔ نن کوڑی کروک آتا برخلاف کارروائی کرین تو ہمووخت آ داگڑاسہی مسوسس، ولے اسہ وار ولدا دا مافیاک پاکستانی تے تکلیف تننگ کن دُوارہ آن کھد انا کوڑی کننگ نا بناءِ کرینو، کھد ءِ تینا گودام تیٹی تخنگ نا بناءِ کرینو، ہراڑآن کھد انا کاختی مس و دانا نہاد آتیٹی ودکی مس، یوریاکھد انا بابت مصنوعی تنکی ودی کننگ انگ ءِ۔ دانا توننگ اٹ غٹ چیف سیکرٹری و آئی جی تے گام گیج کننگ نا پاننگانے و دامافیاتا برخلاف کارروائی کننگ کن اوفتے 24 گھنٹہ نا وخت تننگانے۔ وزیراعظم داپارت تسنے کہ دا کوعڑی کروک آتا برخلاف ہچءُ رعایت اس کننگپک۔ اوفتے کانود نا رداٹ سزا ترفنگک و اوفتے اوفتا کروک نا سزا تننگک۔ اوپارے کہ کوڑی کروک آ مخلوق ننے آن ءُ و اوفتے اندازہ اف کہ او بیرہ تینا فائدہ کن تینا سنگتی ایلم تے اخس نسخان ایترہ، نن بھاز انگا مخلوق ءِ ہلکن، واوفتے عدالت آتیادرین، سزاترفین ولے ولدا آن دا چرجوئی بناکرینے۔ دابیرہ اسہ مافیااس اف، داٹی دوکاندار، ڈیلرو پین پین غٹ اوار ءُ۔
