بیجنگ۔ 12 دسمبر (اے پی پی) چین نا وزیر خارجہ وانگ یی تینا ایرانی ہم منصب حسین امیر عبداللہیان تون فون آگپ وتران اٹی غزہ ناحالیت و ہڑتوم آ کنڈآتا تعلقداری آ گپ وتران کرے۔ چینی خبررساں ادارہ شنہوانا حوال نا رداٹ وانگ یی جوکمیونسٹ پارٹی آف چائنا نا مرکزی کمیٹی نا پولیٹیکل بیورو نا باسک ہم ارے، پارے کہ فلسطین اسرائیل جھیڑہ غا چین نا موقف جنگ بندی و جھیڑہ غاتے زوت آن زوت چٹفنگ، انسانی امداد ءِ پک کننگ و اِراریاستی ایسری نا کنڈآواپسی ءِ۔ ایرانی وزیر خارجہ امیر عبداللہیان اقوام متحدہ نا سلامتی کونسل نا کماشی ٹی غزہ ٹی انسانی بنداوتیا جنگ بندی کن چین نا کوشست آتا ستاءِ کرے۔ اوپارے کہ ایران زالبول و چناتا خون نا مخالفت ءِ کیک و غزہ ٹی دمدستی جنگ بندی و انسانی ہمدردی نا بنداو آ امداد نا فراوانی کن راہداری تے ملنگ نا مخ تف ءِ۔ اوناپاننگ ئس کہ اقوام متحدہ فلسطین نا ویل انا آخبت نا ایسری ٹی اہم کڑد ادا کے۔ اوپارے کہ ایران علاقائی سلامتی و سوگوی نا رکھ اکن علاقائی ملک آتون خڑکی رابطہ ءِ برقرار تخنگ کن تیار ءِ۔ ایرانی وزیرخارجہ پارےکہ اونا ملک چین انا کنڈآن سلاہ کروک جہانی سلامتی نا گام گیج آتا مخ تفی ءِ کیک و گمان کیک کہ چین غزہ نا حالیت آتا شدت ءِ کم کننگ، فلسطین نا ویل انا ایسری و علاقائی امن و سوگوی نا رکھ اکن زیات فعال وڑاٹ سنبرینگوک ءِ۔
