زالبول ومظلوم تپہ غاتیا بیدادی نا چٹفنگ و اوفتا حق انا رکھ اکن گچین کانود سازی اتون اوار اوار اوفتیا عملدرآمد ءِ پک کننگ کن گچین گام گیج کننگ نا گرج ءِ، بولان میڈیکل ہسپتال کوئٹہ نا میڈیکل سپرنٹنڈنٹ ڈاکٹر کمالان گچکی

کوئٹہ۔ 11 دسمبر (اے پی پی) بولان میڈیکل ہسپتال کوئٹہ نا میڈیکل سپرنٹنڈنٹ ڈاکٹر کمالان گچکی پارینے کہ زالبول ومظلوم تپہ غاتیا بیدادی نا چٹفنگ و اوفتا حق انا رکھ اکن گچین کانود سازی اتون اوار اوار اوفتیا عملدرآمد ءِ پک کننگ کن گچین گام گیج کننگ نا گرج ءِ۔ داہیت ءِ اودوشنبے نادے آ بولان میڈیکل ہسپتال اٹی شفاء فاؤنڈیشن کوئٹہ و ورلڈ فوڈ پروگرام نیوٹریشن پروجیکٹ (بے نظیر نشوونما پروگرام کوئٹہ ) نا کمک اٹ 16 دے ئی آگاہی مہم (جنسی و صنفی بیدادی نا چٹفنگ) نا چرجوئی ٹی آگاہی واک انا بشخ ہلوک آتیان تران کرسا پارے۔ واک اٹی بی آئی ایس پی نا اسسٹنٹ ڈائریکٹر ، پرنسپل بی ایم سی ، مرسی کور بلوچستان نا نمائندہ ، شفافاؤنڈیشن نا صوبائی و ضلعی نمائندہ و ایلوفک بشخ ہلکر۔ ڈاکٹر کمالان گچکی پارےکہ زالبول ومظلوم تپہ غاتیا بیدادی نا چٹفنگ کن حکومت تون اوار اوار راج انا ہر بندغ ءِ تینا کڑد ءِ ادا کننگ نا گرج ءِ دا چرجوئی ٹی شفا فاؤنڈیشن نا کنڈآن آگاہی واک اسے نا بست وبند اسہ جوان ءُ گام اسے۔ شفافاؤنڈیشن نا ضلعی کوارڈی نیٹر پارےکہ 16 دے ئی مہم نا چرجوئی ٹی پروجیکٹ اسٹاف نا تربیت ءِ ہم کننگانے۔ ارٹ میکو ریسہ ٹی کمیونٹی نا کہول آ آگاہی مہم اس چلیفنگ انگ ءِ و مہم ءِ ایسر اینوواک انا دروشم اٹ کننگانے۔