قومی کمیشن وقار نسواں نا انسانی حق انا دے انا وخت آ سائیکلنگ ایونٹ نا بست وبند

اسلام آباد۔ 11 دسمبر (اے پی پی) قومی کمیشن وقار نسواں نا چیئرپرسن نیلوفر بختیار ہرپاکستانی زالبول آتا بریبر حق و زرگزرانی واکداری آ زور شاغسا پارینے کہ زالبول آتے  پین مالی و اقتصادی واکدار جوڑ کننگ صنفی بنداو آ بیدادی نا برخلاف گچین جنگی حکمت عملی اسے ، قومی کمیشن 11 دسمبر آ قومی زالبول آک واپاری میلہ اس اڈایترہ تانکہ ملک انا غٹ ڈیہہ تیان بروک آ پاکستانی زالبول کاروباری تا لائخی تے مون آ دننگ مرے۔ داخیال آتا درشانی ءِ او قومی کمیشن وقار نسواں نا کنڈآن انسانی حق انا دے انا بابت سائیکلنگ ایونٹ نا بشخ ہلوک آتیان تران کرساکرے۔ قومی کمیشن وقار نسواں یک شنبے نادے داڑے شریداری یعنی برداشت پاکستان، کیپٹل ڈویلپمنٹ اتھارٹی، رائٹ ٹوپلے، اسلام آباد سائیکلنگ ایسوسی ایشن و دختران پاکستان نا شریداری اٹ سائیکلنگ سنڈے، نا سرحال آن سائیکلنگ ایونٹ نا بست وبند ءِ کرے۔ انسانی حق انا جہانی دے انا وخت آ دا دود انا بست وبند ءِ صنفی بنداو آ بیدادی  نا برخلاف 16 دے ئی سرگرمی نا مہم نا اسہ بشخ اسے نا وڑاٹ کننگا۔ دادود انا مسخت اسہ سوگو کلہو اس تالان کننگ ءِ کہ پاکستان اٹ زالبول آتون بریبر ی سلوک کننگے و آئین پاکستان نا آرٹیکل 25 نا رداٹ اوفتے بریب حق بایدے ملے۔ چیئرمین کیپٹل ڈویلپمنٹ اتھارٹی کیپٹن (ر) انوارالحق بطور مہمان خاص بشخ ہلک۔ کمیشن نا کنڈآن تدوک آ مسہ سال آن دا دود انا بست وبندءِ کننگ انگ ءِ، و دا سال موٹرسائیکل سوار آک ہم بشخ ہلکر۔ بشخ ہلوک آتیٹی بنداوی وڑاٹ جاڑ انگا شار تا مسن و زالبول آک اوار ئسر، ہرافک نارنجی رنگ انا پچ، ٹوپ و اسکارف بینسا دا کلہو ءِ تسر کہ صنفی بنداو آ بیدادی نا ہردورشم ءِ سگنگ مفک۔ قومی کمیشن وقارنسواں نا چیئرپرسن نیلوفر بختیار دود آن تران کرسا پارے کہ ہرپاکستانی زالبول اکن بریبر حق و زرگزرانی  واکدار جوڑ کننگ آ زور شاغا انتئے کہ اوہرمشکل وخت اٹی تینے زیات بہادر ، لچکدار و سوگو پک کرینے۔