اسلام آباد۔ 11 دسمبر (اے پی پی) ایشیائی شونداری بینک مالیاتی بشخ اسکان زالبول آتا رسینگ اٹ ودکی و چنکا و نیامی درجہ نا کاروبار کن زالبول آتے وام تا فراوانی نا رداٹ پاکستان کن 155.5 ملین ڈالر ناکمکاری نا منظوری ءِ تسنے۔ بینک انا کنڈآن دوشنبے نادے آ جاری اعلامیہ نا رداٹ داکمکاری ٹی 100 ملین ڈالر نا پالیسی وام ہم اوار ءِ ہرا مالیات اسکان زالبول آتا رسینگ ءِ ودفنگ کن کانودی و ضابطہ جاتی اصلاحات کن کاریم اٹ اتنگک، 50 ملین ڈالرمالیاتی انٹرمیڈیٹیشن وام ہم داکمکاری نا بشخ ءِ ہرانا رداٹ زالبول آتے وام انا فراوانی کن مالیاتی ادارہ غاتا کمک ءِ کننگک، داکان بیدس مالیات نا بابت سرجزآتیکن 5.5 ملین ڈالر نا پین کمک ہم فراوان کننگک۔ ایشیائی شونداری بینک اناڈائریکٹر جنرل نیامی و دیکی ایشیا یوگینی زکوپ تینا بیان اٹی پارینے کہ زالبول آتا شمولیت و اوفتے بریبر اقتصادی وارخواہی فراوان کننگ آن بیدس جوان، و پائیدار شونداری نا دوئی کننگ ناممکن ءِ۔ اوپارے کہ بینک انا دا کمکاری آن مالیاتی ایکو سسٹم ءِ گچین گچین کننگ، مالیات اٹ زالبول آتا رسینگ اٹ ودکی و زالبول آتے واکدار کننگ و اوفتے روزگار نا فراوانی ٹی کمک رسینگک۔ اعلامیہ نا رداٹ پاکستان نا افرادی قوت اٹ زالبول آتا بشخ 23 درسد وخت اس کہ کاروباراٹی اوفتا شمولیت نا کچ دنی انا ایلو ملک آتا مقابلہ ٹی کم ءِ۔ اے ڈی بی نا سینئر اکانومسٹ اینڈ ریومیکارتے پارے کہ پاکستان اٹ کاروباری زالبول آتا اسہ کچ اس ساڑی ءِ ولے اوفتا ساڑی گری نا اعتراف ءِ کننگپک۔ اوپارےکہ کاروباری زالبول آتا کاریم نا کچ اٹی گچینی و اوفتے کن سازگار چاگڑدنا فراوانی کن پالیسی اصلاحات المی ءِ۔
