اسلام آباد۔ 11 دسمبر (اے پی پی) اسپیکر قومی اسمبلی راجہ پرویز اشرف بھارتی حکومت نا 5 اگست 2019 نا مقبوضہ جموں کشمیر نا خصوصی حیثیت ءِ چٹفنگ نا گام انا برخلاف اپیل آتیا بھارتی سپریم کورٹ نا فیصلہ ءِ است ہسون گوندسا پارینے کہ دا فیصلہ جانبدارانہ و جہانی کانودآتیان چپ ءِ۔ دوشنبے نادے آ فیصلہ غا تینا ردعمل آ تالان بیان اٹی اوپارےکہ بھارتی سپریم کورٹ نا فیصلہ سلامتی کونسل نا قرارداد آتا خلاف ورزی ءِ ، بھارتی سپریم کورٹ انا کنڈآن مقبوضہ کشمیر ءِ بھارت نا اٹوٹ انگ گوندنگ بے کچ افسوزناکءِ، بھارت کشمیر نا بابت سلامتی کونسل نا قرارداد آتیان پدریسہ نرنگ ءِ ، بھارتی سپریم کورٹ نا فیصلہ غان کشمیری الس نا جوزہ غاک بھاز بےوڑ مجروح مسنو۔ اوپارےکہ بھارتی سپریم کورٹ نا فیصلہ کشمیری الس نا است خواہی تیان چپ ءِ۔ کشمیری الس تدوک آ 7 دہائی آن زیات وخت آن کشمیرنا آجوئی کن جہد کننگ ءُ، بھارت نا انتہاپسند حکومت نا چم آک کشمیری الس نا حق خودارادیت نا جہدءِ توننگ کپسہ۔ راجہ پرویز اشرف پارے کہ کشمیری الس کشمیر نا آجوئی کن بے مٹ قربانی تسنو، بھارتی حکومت و سپریم کورٹ نا متعصبانہ و جانبدارانہ فیصلہ کشمیری الس نا حوصلہءِ شیف شاغنگ کپک، کشمیری الس نا جہد آجوئی کشمیر اٹی آجوئی نا دے انا دے ٹک تننگ اسکان برجاسلک۔ پاکستان کشمیری الس نا اخلاقی، سیاسی و سفارتی مخ تفی ءِ برجاتخک۔ پاکستان نا پارلیمان غٹ علاقائی و جہانی فورم آ کشمیری الس ناتوار ءِ تالان کرسا کیک۔ جہانی برادری سلامتی کونسل نا قرارداد و کشمیری الس نا است خواہی تا رداٹ کشمیر اٹ استصواب رائے کرفنگ کن کڑ داداکے۔
