پالیسی تا تسلسل مفننگ نا سوب آن ننے دہشت گردی نا برخلاف کٹوک آ جنگ اتون دُوارہ مون تروئی تمنگ ءِ، نگران وزیرداخلہ سرفراز احمد بگٹی نا پولیس لائنز اٹی تران

اسلام آباد۔ 11دسمبر (اے پی پی) نگران بنجائی وزیر داخلہ میر سرفراز احمد بگٹی پاکستان ءِ دہشت گردی نا ناسور آن پاک کننگ نا عزم انا درشانی ءِ کرسا پارینے کہ پالیسی تا تسلسل مفننگ نا سوب آن ننے دہشت گردی نا برخلاف کٹوک آ جنگ اتون دُوارہ مون تروئی تمنگ ءِ ، دا پاکستان نا فوج و سول آرمڈ فورس آتا آخا بلکن ریاست نا جنگ ءِ، داٹی سرسہبی کن پارلیمنٹ، عدلیہ و میڈیا تون اوار غٹ اسٹیک ہولڈر آتا اوار مننگ المیءِ۔ اودوشنبے نادے آ پولیس لائنز اسلام آباد اٹی پولیس کانسٹیبلان نا39 می بیچ انا سوغندی دود آن تران کریکہ۔ چیف کمشنر اسلام آباد، آئی جی اسلام آباد، ڈپلومیٹس ، مسکوہی پولیس آفیسر آک ہم دود اٹی ساڑی ئسر۔ نگران بنجائی وزیر داخلہ میر سرفراز احمد بگٹی پارے کہ کنکن دا بے کچ خوشی نا ہیت ءِ کہ عملی زند انا سفر نا بناءِ کروک آزالبول و نرینہ پولیس کانسٹیبلان آتون مخاطب مننگ اٹی اُٹ۔ دا ورناتے تینے الس کن وقف کروئیءِ۔ اوپارے کہ داوخت آ ننے اِرا وڑنا چیلنج مون تروک ءِ ہرافتے ٹی مذہب نا بنداو آ دہشت گردی  و قوم پرستی نا بنداو آ دہشت گردی اوار ءِ حالانکہ دا ہڑتوم آ گڑاتا دہشت گردی تون ہچ ءُ تعلق اس اف، اسہ سازش اسے نا رداٹ دہشت گردی ءِ مذہب و قوم پرستی اتون گنڈنگ نا کوشست کننگانے۔ ملک ءِ نزور کننگ کن ’’پراکسیز‘‘ کننگ انگ ءِ اودے بے سہب کننگ کن پاکستان نا سلہہ بند فوج و سول آرمڈ فورس آک قربانی نا عظیم جوزہ اٹ فرنٹ لائن آ سلسا دنیا ٹی پوسکن ءُ درور اس نوشتہ کرینو۔ اوپارے کہ 1947 آن پد نناغٹ انا اسہ ہی شناخت ءِ اودے پاکستانی، نن غٹ آن مست پاکستانی واوکان پد سندھی، بلوچ، پنجاب، سرائیکی ، گلگتی و کشمیری اُن، داسازشءِ ہم بحیثیت قوم اواری اٹ بے سہب کننگ اُن۔ وزیرداخلہ پارے کہ پاکستان اسلام نا قلعہ ءِ ہنداسوب آن اودے چیلنج کننگانے، اسلام ننے یکجاکیک، ہندا سیوت ءِ نسخان تننگ کن ننے آ جنگ ءِ مسلط کننگا، ننا فوج و سول آرمڈ فورس آک جیرت مندی اٹ مقابلہ ءِ کریر، دہشت گردی نا برخلاف جنگ اٹ جون تے ندر کروک آ شہید آتا یات ننا است آتیٹی مدام سلک۔ اوپارے کہ اسہ ہیت اس پیدوار ءِ کہ  طاقت نا کاریم اٹ اتنگ نا اختیار بیرہ ریاست تون ءِ، بیدادی نا کسر ءِ تینا کروک آتا دوتے توروئی تمک۔ نگران وزیرداخلہ پارے کہ بلوچستان اٹی تدوک آدے دہشت گردی نا واقعہ ٹی سی ٹی ڈی نا انسپکٹر شہید مس ، منہ دے مست ہم سی ڈی ٹی نا آفیسر اس شہید مسوسس ولے ایلو کنڈآ سی ٹی ڈی آ مقدمہ ہم جوڑ مننگ ءِ، بحیثیت قوم جنگ کننگ کن گڑاس سجفوئی مریک۔ اوپارےکہ گڑاس مخلوق اسمبلی تیٹی و میڈیا نا حلقہ غاتیٹی تولسا منظم سازش نا رداٹ ملک دشمن زموار آتا توار جوڑ مننگ ءُ، دادے ہم بھاز خڑک آن ہُننگ اُن۔ دہشت گردی نا برخلاف جنگ اٹی سرسہبی آن ننے ہچ ءُ طاقت اس توننگ کپک۔ اوپارے کہ ہراتم ادارہ غاک غیرسیاسی مریرہ تو اوسوگو مریرہ۔