بیجنگ۔ 08 دسمبر (اے پی پی) بلوچستان نا ورناتا 6 باسکی ڈل انا چین نا 10 دے ئی دورہ ایسر مس۔ میر مسعود خان کھیتران نا کماشی ٹی ڈل دارالحکومت بیجنگ و ہینان صوبہ نا دورہ ءِ کرے، دا دورہ چینی حکومت نا سلہ غا کننگا۔ ڈل انا باسک آتا تعلق گوادر، تربت، پنجگور و بارکھان آن ئس، ہرافک سینئر چینی عہدیدارآتون اوڑدہی کریر و چندی ادارہ غاتا دورہ ءِ کریر۔ میر مسعود خان کھیتران بیجنگ آن پدی بننگ آن مست اے پی پی ءِ پارے کہ ڈل صوبہ ہینان نا 3 آن 4 شار تا دورہ ءِ کرے و چندی کمپنی تا سروک آتون اوڑدہی کرے۔ اوپارے کہ اوصوبہ ہینان اٹی سینئر کمامدار و سٹی میئرآتون اوڑدہی کرے و بیجنگ اٹ کمیونسٹ پارٹی آف چائنا(سی پی سی) نا خارجہ تعلقات نا بشخ انا سروک تون ہم اوڑدہی کرے۔ اوپارے کہ چینی کمامدار وکمپنی تا سروک آک بھاز جوان خیال آتا درشانی ءِ کریر و تین پہ تینی فائدہ غاتیکن پاکستان خاص وڑاٹ صوبہ بلوچستان اٹی زرکاری کننگ نا عزم انا درشانی ءِ کریر۔ میر مسعود کھیتران چین نا تدوک 30 سال اٹی بھلو کچ اسے آ و ترند رفتار راجی و اقتصادی شونداری نا ستاءِ کرساپارے کہ ہراوڑ چینی حکومت و الس بنداوی پنجر، سڑک و ہن و برنا نیٹ ورک ءِ شون تس و قومی میرات و دودوربیدہ ءِ رکھ کرے او بھاز سفت نا قابل ءِ۔ اوگوادر و بلوچستان نا ایلو علاقہ غاتیٹی چین پاکستان اقتصادی راہداری (سی پیک) نا رداٹ برجاشونداری ڈٹ آتیا است جمی نا درشانی ءِ کرسا پارے کہ گوادر پورٹ و صوبہ ٹی ایلو ڈٹ ہڑتوم آ ملک آتا زرگزران و الس کن کمکارجوڑ مریک۔ اومستی پارے کہ پاکستان و چین اسیجائی وڑاٹ شونداری و شونہالی دوئی کننگ کیرہ و چینی کمپنیک بلوچستان اٹی بھلو کچ اسے آ زرکاری کننگ کن تیار ءُ۔ میر مسعود کھیتران پارے کہ مرکزی حکومت ءِ صوبہ ٹی مخلوق کن تعلیم و جان جوڑی نا آسراتی تون اوار اوار روزگار نا وارخواہی ءِ پک کننگ نا گرج ءِ۔ اوپارے کہ او حکومت آن صوبہ ٹی الس نا فائدہ کن بجلی نا ویل آتامون ءِ توننگ نا بابت درخواست کرینے۔
