کاروباری برادری و زرکارآتا پاکستان کن خذمت ستاکڑزک، نگران وزیراعظم انوارالحق کاکڑ

کراچی۔ 08 دسمبر (اے پی پی) نگران وزیراعظم انوارالحق کاکڑ پارینے کہ پاکستان نا کاروباری برادری و زرکارآتا پاکستان کن خذمت ستاکڑزک، حکومت زرگزران ءِ دستاویزی جوڑ کننگ و ادارہ جاتی اصلاحات نا ایجنڈا غا عمل کننگ ءِ۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او پاکستان اسٹاک ایکسچینج نا باسک و پاکستان نا پنی آ کمپنی تا سروک آتون گپ وتران کرساکرے ہرافک جمعہ نادے آ داڑے اوڑتون اوڑدہی کریر۔ اوڑدہی ٹی نگران بنجائی وزیر خزانہ و پاکستان اسٹاک ایکسچینج نا چیئرپرسن ڈاکٹر شماد اختر، چیف ایگزیکٹیو آفیسر پاکستان اسٹاک ایکسچینج فرخ خان، چیئرمین سیکورٹیز اینڈ ایکسچینج کمیشن آف پاکستان عاکف سعید و پاکستان نا ایلو پنی آکمپنی تا سروک آک بشخ ہلکر۔ اوڑدہی ٹی سی ای او پاکستان اسٹاک ایکسچینج وزیراعظم نا خصوصی دورہ غا اونا منت واری ءِ ہرفے و اسٹاک ایکسچینج نا بابت حوال تس۔ اوڑدہی ٹی وزیراعظم ءِ پاننگاکہ تدوک آ منہ تُو اٹی پاکستان اٹی حکومت نا کاروبار دوست پالیسی تا سوب آن زرکار و کاروباری برادری نا پت ودانے ہرانا سوب آن اینو پاکستان اسٹاک ایکسچینج اٹی ریکارڈ کہول آ کاروبار برجاءِ۔ اوڑدہی ٹی بشخ ہلوک آک جہانی مالیاتی ادارہ نا پروگرام نا بابت حکومت نا سنجیدگی و ادارہ جاتی اصلاحات نا گام گیج آتا ہم ستاءِ کریر۔ وزیراعظم داوخت پارے کہ پاکستان نا کاروباری برادری و زرکارآتا پاکستان کن خذمت ستاکڑزک۔ وزیراعظم مستی پارے کہ کاروباری برادری و زرکارآتے آسراتی فراوان کننگ حکومت نا اولیت آتیٹی اوار ءِ۔ وزیراعظم زوت آتے اٹ جوڑ مروک خصوصی زرکاری سہولت کونسل نا جوڑ کننگ و اونا پاکستان اٹ پیشن نا زرکاری نا بابت مثبت گام گیج و اونا است بڈ نتیجہ غاتے ہم مون آتخا۔ وزیراعظم مستی پارے کہ حکومت تینا ادارہ جاتی اصلاحات نا ایجنڈا غا عملدرآمد ءِ پک کننگ ءِ۔ حکومت زرگزران ءِ دستاویزی جوڑ کننگ نا بابت ہم عملی گام گیج کننگ ءِ۔