کراچی۔ 08 دسمبر (اے پی پی) نگران وزیراعظم انوارالحق کاکڑ پارینے کہ زند ءِ بامسخت جوڑ کننگ و روشنا آخبت کن تعلیم المی ءِ، پاکستان اٹ درشانی سلاہ نا پورو آجوئی ءِ، گورننس ءِ گچین کروئی مریک، غٹ پاکستانیک بریبرءُ، میرٹ نانظام ءِ لاگو کننگ آن بیدس نن مون آ ہِننگ کپنہ، پروفیشنل آتا پیشن نا ملک آ ہِننگ ءِ منفی تکنگپ۔ داخیال آتا درشانی ءِ او جمعہ نادے آ داڑے آغاخان یونیورسٹی نا طالب علم آتون خصوصی گپ وتران و سوج و ورندی نا نشست اٹی کرے۔ نگران وزیراعظم تینا بنائی ہیت آتیٹی پارے کہ تعلیم و تعلیمی ادارہ غاک مدام کنا است آن خڑک مسنو۔ نمان تعلیمی ادارہ غاک مدام تینا کنڈآ چکانو۔ زند ءِ بامسخت جوڑ کننگ کن تعلیم المی ءِ۔ گلگت بلتستان نا اسہ طالب علم اسےنا کنڈآن سوج آ وزیراعظم پارے کہ گلگت بلتستان جغرافیائی لحاظ اٹ اہم حیثیت تخک ۔ داپاکستان نا بشخ ءِ و انشاء اللہ مدام مریک ۔ گلگت بلتستان نا حیثیت ءِ اقوام متحدہ نا قرارداد آتا رداٹ کشمیر نا بشخ انا وڑاٹ ہروئی مریک۔ نگران وزیراعظم پارے کہ پاکستان و بھارت کشمیر آ مسہ جنگ کرینو۔ پاکستان گلگت بلتستان نا بابت ہرا گام گیج آتے کرینے او الس ءِ حق تننگ کن ءُ۔ گلگت بلتستان پاکستان نا بایدے سنگاپور مروسس انتئے کہ دا وسیلہ غاتیان شپ ءُ علاقہ اسے۔ درشانی سلاہ نا آجوئی نا بابت نگران وزیراعظم پارے کہ پاکستان اٹ ہر شاری ءِ درشانی سلاہ نا حق دوئی ءِ۔ اینو ہم داڑے طالب علم و وزیراعظم نا نیام اٹ گپ وتران و سوج و ورندی نشست اٹی آجوئی اٹ ہیت کننگ انگ ءِ، داپاننگ کہ ملک اٹی درشانی سلاہ نا آجوئی اف۔ داہیت اٹی وزن اف۔ درشانی سلاہ مثبت و تعمیری بایدے مرے۔ اوپارے کہ ملک اناسیاسی تاریخ و ایلو سرحال آتیا گھنٹہ شرہ مننگ کیک۔ اسہ سوج اسے نا ورندی ٹی وزیراعظم پارے کہ 18 می ترمیم آن پد جان جوڑی نا بشخ صوبہ غاتیا ہنا، داسہ صوبہ غاتا زمواری ءِ دا بابت گام گیج کیر۔
