کراچی۔ 08 دسمبر (اے پی پی) نگران وزیراعظم انوارالحق کاکڑ پارینے کہ ملک انا زرگزران نا گچین حالیت آتا سوب آن اسٹاک مارکیٹ اٹی ترندی نا رجحان ءِ ہرا داوخت آ تینا تاریخ نا بڑزکو کچ آٹے، آئی ایم ایف تون سٹینڈ بائی معاہدہ غان زرکارآتا پت بحال مسنے، ہموزرگزرانی سوگوی کن کوشست کننگ اُن ہرانا بھرم تیان ہرتپہ فائدہ ہرفے، بنجائی حکومت زرگزران نا گچینی کن زرکارآتے آسراتی فراوان کرساکیک۔ اوداخیال آتا درشانی ءِ جمعہ نادے آداڑے پاکستان اسٹاک ایکسچینج اٹی ملکی زرگزرانی شونداری و اقتصادی لچک نا بابت اڈہلوک دود آن تران کرسا کرے۔ داوخت آ نگران بنجائی وزیر خزانہ ومحصولات ڈاکٹر شمشاد اختر و وزارت خزانہ ، اسٹاک مارکیٹ ، سیکورٹیز اینڈ ایکسچینج کمیشن آف پاکستان نا و ایلو تعلقدار کمامدارآک ہم ساڑی ئسر۔ نگران وزیراعظم پارے کہ ملکی زرگزران اٹ سٹاک مارکیٹ نا اہم ءُ کڑد اسے۔ وزیراعظم پارے کہ حکومتی سیکورٹیز آکشنز، زرکارآتا پت ءِ ودفنگ، وام تا دوئی کننگ اٹ آسانی و شفافیت ءِ مون آ دننگ کن گام گیج کننگ انگ ءِ۔ سٹاک ایکسچینج نا کمک اٹ زرکارآتا کنڈآن حکومتی اجارہ سکوک نا اولیکو پرائمری آکشن اٹی بشخ ہلنگ نا ستاءِ کینہ۔ اوپارے کہ ریٹیل زرکارآتا خاص وڑاٹ است بڈی نا گرج ءِ۔ سٹاک بروکر ایسوسی ایشن ، ایس ای سی پی و مارکیٹ اٹی زرکاری کروک آتا پرائمری مارکیٹ آکشن ءِ مون آدننگ نا اجتماعی زمواری ءِ۔ وزیراعظم پارے کہ سٹاک مارکیٹ آن کاروباری سرجزآتا مون آدننگ اٹ کمک رسینگک۔ شونداری و شونہالی نا کنڈآ ہِننگ نا وارخواہی ملک۔ برجاسال ننا زرگزران ءِ چندی چیلنج آتا مون تروک مسنے و حکومت پنجرجاتی و مائیکرو اقتصادی ویل آتے ایسر کننگ کن پبی گام گیج کرے۔ دا چرجوئی ٹی زرگزران ءِ دُوارہ تینا کسر نا کنڈآ دننگ کن غٹ تعلقدار فریق آتا کمک نا ستاءِ کینہ ہراڑان ڈالر نا قدر ءِ شیف اتنگ اٹ کمک رسینگانے ہراکہ 5 ستمبر 2023آ 307 روپئی اسکان سرمسوسس و اینو دا انٹربینک اٹی 284 روپئی نا لگ بھگ ءِ، داڑآن افراط زر انا کچ اٹی ہم کمتی مسنے۔ وزیراعظم پارے کہ حکومت نا کنڈآن آئی ایم ایف تون سٹینڈ بائی معاہدہ غان زرکارآتا پت بحال مسنے۔ اوپارے کہ حکومت نا دا مثبت گام گیج آتیان ملک اٹی سازگار کاروباری سرجزآتیکن چاگڑد ودی مسنے۔ ملکی زرگزران نا گچین حالیت آتا سوب اسٹاک مارکیٹ اٹ ترندی نا رجحان ءِ ہراداوخت آ تاریخ نا بڑزکو کچ آٹے۔ وزیراعظم پارے کہ بنجائی حکومت پائیدار اقتصادی شونداری و زرگزران نا گچینی و کیپٹل مارکیٹ نا مون آ دننگ کن زرکارآتے آسراتی فراوان کرسا کیک۔ نن جدت ءِ مون آدننگ، ریگولیٹری فریم ورک اٹ گچینی اتنگ و شفافیت کن کوشست آتے بایدے برجاتخن تانکہ او بنداو سوگو سلے ہراڑاننا کیپٹل مارکیٹ سلوک ءِ۔ وزیراعظم پارے کہ نن ہندن ءُ زرگزرانی سوگوی اسے کن کوشست کننگ اُن ہرانا بھرم تیان ہرتپہ فائدہ ہرفے۔ اوکان پد وزیراعظم رسمی گھنٹہ ءِ خلسا سٹاک مارکیٹ اٹی کاروباری سرجزآتا بناءِ کرے۔ دود آن نگران بنجائی وزیر خزانہ و محصولات ڈاکٹر شمشاد اخترئسک ہم تران کریر۔
