کوئٹہ۔ 08 دسمبر (اے پی پی) نگران بنجائی وزیرحوالکاری ، شینکاری و پارلیمانی امور مرتضیٰ سولنگی مسکوہی چیئرمین پی ٹی آئی نا ٹویٹ اٹی خلوک دوبہ غاتے بے بنداو گوندسا پارینے کہ پنچ لکھ غیرکانودی رہینگوک بندغ آک پاکستان آن منشاکارانہ وڑاٹ تینا وطن آ پدی ہنار، اوفتے زوراکی اٹ کشنگتنے، ملک اٹی آجو، انصاف اٹ وبے کنڈ ہلوک گچین کاری تا اڈتننگ کن حکومت سنبرینگوک ءِ، گچین کاریک 8 فروری آ مریرہ، دا بابت ہچ وڑنا بایدے شک و شبہ اس مف۔ الیکشن کمیشن نامالی، انتظامی و سیکورٹی گرج آتے پورو کینہ، گچین کاری تیٹی غٹ رجسٹرڈ سیاسی جماعت آتے اسہ وڑسیکورٹی و وارخواہی ملک، خوشی ءِ کہ ملک زرگزرانی سوگوی نا کنڈآ ہِننگ ءِ ، اسٹاک ایکسچینج 100 انڈیکس اینو 66 ہزار نا حد ءِ عبور کرینے، ڈالر نا مقابلہ ٹی روپئی نا قدر اٹی ہم گچینی بسنے، ریاستی میڈیا غا رجسٹرڈ سیاسی جماعت اسے نا کوریج آ پابندی اف، غٹ رجسٹرڈ سیاسی جماعت آتے اسہ وڑ کوریج تننگ انگ ءِ۔ پاکستان ہمووخت آ سوگو مریک ہراتم اونا زبان و کلچر سوگو مریک، پی ٹی وی بولان نا نشریات بلوچستان نا مرمر انگا علاقہ غاتسکان سرکننگ کن گام گیج کننگ انگ ءِ۔ داخیال آتا درشانی ءِ او جمعہ نادے آ داڑے کوئٹہ پریس کلب اٹی صوبائی وزیر آتون اوار پریس کانفرنس آن تران کرسا کرے۔ نگران بنجا ئی وزیر حوالکاری پارے کہ نگران حکومت ساف، شفاف و بے کنڈ ہلوک گچین کاری تا اڈتننگ کن سنبرینگوک ءِ، 8 فروری آ مچ آملک اٹی گچین کاری مریک، دا بارواٹی کس اسے شک و شبہ بایدے مف۔ اوپارے کہ بنجائی حکومت ہرچار آ صوبائی حکومت آتون اواری اٹ دا فرض ءِ سرایتک۔ مرتضیٰ سولنگی پارے کہ ننا آئین نا تمہید اٹی نوشتہ ءِ کہ دا ملک ءِ اونا گچین مروک آ نمائندہ غاک چلیفرہ، ننے ہراحالیت اٹی ملک ملانے، اوکان جوان حالیت اٹی بروک آ گچین مروک آ حکومت نا دوٹی ایتنہ۔ اوپارے کہ ننے خوشی ءِ کہ ملک زرگزرانی سوگوی نا کنڈآ ہِننگ ءِ۔ اینو پاکستان اسٹاک ایکسچینج 100 انڈیکس 66 ہزار نا حد ءِ عبور کرینے، ڈالر نا قدر اٹی ہم کمتی مسنے ، گڑاس مخلوق ہوکاتالان کریرہ کہ آئی ایم ایف نا بروک آ بورڈ اٹی پاکستان نا کیس اوار اف وخت اس کہ بلومبرگ نا اینونا خبرءِ کہ 11 جنوری آ پاکستان آئی ایم ایف بورڈ انا ایجنڈاٹی اوار ءِ۔ پی ٹی وی کوئٹہ سینٹر نا دورہ نا بابت نگران بنجا ئی وزیر حوالکاری پارے کہ بلوچستان ملک انا جغرافیائی رقبہ نا 43 درسد بشخ ءِ ہرا تاریخی اعتبار اٹ اسہ متنوع صوبہ اسے۔ اوپارے کہ پی ٹی وی بولان نا نشریات آتے انٹینا نا کمک اٹ بلوچستان نا مرمرا نگا علاقہ غاتسکان سرکننگ نا کوشست کینہ۔ اوپارے کہ 17 دسمبرآ ن پی ٹی وی بولان آ ہزارگی زبان اٹی ہم نشریات نا بناءِ کننگ انگ ءِ، پی ٹی وی بولان نا تکنیکی و ہیومن ریسورس گرج آتے پورو کینہ۔ اوپارے کہ نگران حکومت نا واکداری و مد کچ اٹی ءِ، کوئٹہ پریس کلب و بلوچستان نا صحافی تا راجی آسودہی کن انتس کہ ممکن مریک، گام گیج کینہ۔ اسہ سوج اسے نا ورندی ٹی اوپارے کہ گچین کاری تیٹی ہرجماعت الس نا ہمدردی دوئی کننگ نا کوشست کیک، جمہوریت نا تہہ ٹی شور مریک، خاموشی مف۔ مسکوہی چیئرمین پی ٹی آئی نا ٹویٹ نا بابت سوج آ او پارے کہ پی ٹی آئی نا مسکوہی چیئرمین نا ٹویٹ اٹی ہرا دوبہ غاتے خلنگانے اوفتا ہچ ءُ بنداو اس اف، پنچ لکھ غیرکانودی رہینگوک بندغ آک پاکستان آن رضاکارانہ وڑاٹ ہنار، اوفتے زوراکی اٹ کشنگتنے۔ داٹویٹ آن گچین کاری تیٹی ہندن ءُ حالیت ودی کننگ نا کوشست کننگانے ہراڑان ایلو سیاسی جماعت آتا مقابلہ ٹی اودے زیات فائدہ مرے۔ اوپارے کہ گچین کاری تیٹی غٹ رجسٹرڈ سیاسی جماعت آتے اسہ وڑ سیکورٹی و وارخواہی دوئی مریک۔ اسہ سوج اسے نا ورندی ٹی اوپارے کہ جمعیت علماء اسلام نا پاکستان نا سیاسی نظام و سیاسی تاریخ اٹ اہم ءُ کڑد اسے، پاکستان نا آئین آ ہرا جماعت آتا سروک آتا دستخط ارے ، اوفتے ٹی جمعیت علمائےا سلام ہم اوار ءِ۔ جے یوآئی و اونا راہشون تا سیکورٹی گڑتی تے مر کننگ بنجائی و صوبائی حکومت آتا زمواری ءِ ، نن تینا زمواری تے پورو کینہ۔
