کوہاٹ۔ 07 دسمبر (اے پی پی) نگران وزیراعظم انوارالحق کاکڑ پارینے کہ پوسکن آ تعلیم ننا اولیت ءِ، خوانوک آ ورناک قوم انا آخبت ءُ، استاد آتا تعلیمی نظام اٹ بھا ز اہم ءُ کڑ د اسے، مادر علمی ٹی تیرکروک آ وخت طالب علم آتے آخبت نا چیلنج آتون مون تننگ کن تیار کیک۔ داخیال آتا درشانی ءِ او پنچ شنبے نادے آ کیڈٹ کالج کوہاٹ نا 58 می لمہ و باوہ دے انا دود آن تران کرساکرے۔ نگران وزیراعظم پارے کہ کیڈٹ کالج نا 58 می لمہ و باوہ دود اٹی بشخ ہلنگ وورناکیڈٹ آتون مخاطب مننگ کنکن شرفمندی نا سوب ءِ۔ مادر علمی ٹی گدریفوک آ وخت ننے آخبت کن تیار کیک۔ پوسکن تعلیم خاص وڑاٹ سائنس و ٹیکنالوجی ہر قوم انا شونداری نا ضمانت ءِ۔ ننے تینے پوسکن آ تعلیم آن آراستہ کننگ کن گام گیج کروئی مریک۔ وزیراعظم پارے کہ استاد آک تعلیمی نظام اٹ بھاز اہم ءُ حیثیت اس تخرہ۔ لمہ وباوہ غاتیا ہم بھلو زمواری اس بیٹ مریک۔ وزیراعظم پارے کہ کیڈٹ کالج کوہاٹ مدام گچین نتیجہ تسنے۔ وزیراعظم پارے کہ دا کالج کنا مادر علمی مسنے۔ ای 1984ٹی بلوچستان نا اسہ پسماندہ علاقہ سے آن تعلیم کن داکالج آبسٹ۔ ای زند اٹی اینو دا ہند آ سرمسونٹ تو دانا سہرا کنا دا مادر علمی نا استاد آتا سرءِ۔وزیراعظم کیڈٹ آتے تلقین کرے کہ او خواری، ایمانداری و لگن اٹ مون آ ہنساکیر، اوفتے کن زند اٹی چیلنج مریک، مشکل بریک ولے سرسہبی اوفتا مقدر مریک۔ وزیراعظم پارے کہ اسہ جوان ءُ انسان اس جوڑ مننگ زند انا غٹ آن بھلا سرسہبی ءِ۔ دود آن تران اٹی نگران وزیراعظم ہراکیڈٹ کالج آن فارغ التحصیل ءِ ، تینا مادر علمی نا بھاز انگا استا د آتا پن ءِ ہلسا ذکر کرے و اوفتے یات کرسا وزیراعظم آبدیدہ مس۔ وزیراعظم پارے کہ کنے ٹی اینو انت جوانی اس ارے اونا سہرا کنا استاد آتا سرءِ۔ داکان مست پرنسپل بریگیڈیئر (ر) طفیل محمد خان پارے کہ کیڈٹ کالج کوہاٹ مدام گچین نتیجہ تسنے و بورڈ امتحان تیٹی ٹاپ پوزیشن دوئی کرینے۔ داکان بیدس ہم نصابی سرجزآتیٹی ہم گچین کارکڑد نا ہم درشانی ءِ کریر۔ کالج نا فارغ التحصیل چندی بشخ آتیٹی نمان خذمت سرتننگ ءُ۔ وزیراعظم کیڈٹ آتا پریڈ نا معائنہ ءِ کرے۔ وزیراعظم ءِ کیڈٹ آتا چاق و چوبند دستہ سلامی تس۔ اوچیمپیئن شپ نا بیرک ءِ رستم ہاؤس نا دوٹی تس۔ داوخت آ چیئرمین بورڈ آف گورنر میجر جنرل ذوالفقار علی بھٹی ہم ساڑی ئس۔ وزیراعظم کیڈٹ آتا کنڈآن گھڑ سواری، نیزہ بازی و جماسٹکس نا درشانی ءِ ہم ہرا۔ وزیراعظم نصابی و ہم نصابی سرجزآتیٹی گچین کارکڑد نا درشانی ءِ کروک آ کیڈٹ آتیٹی انعام بشخا وخت اس کہ کیڈٹ کالج کوہاٹ نا پرنسپل وزیراعظم ءِ کالج نا سوونیئر اس پیش کرے۔
