طالب علم آک کسبکاری، آن لائن و فاصلاتی تعلیم آن پبی فائدہ ہرفر، صدر ڈاکٹر عارف علوی

اسلام آباد۔ 07 دسمبر (اے پی پی) صدر ڈاکٹر عارف علوی ترند و پائیدار ملکی شونداری کن فکری و تعلیمی شونداری آ چکار کننگ آ زور شاغسا پارینے کہ طالب علم آک کسبکاری، آن لائن و فاصلاتی تعلیم آن ہم پبی فائدہ ہرفر، طالب علم آک انفارمیشن ٹیکنالوجی، مصنوعی ذہانت نا بشخ آ خصوصی چکارتخر۔ اوپنچ شنبے نادے آ بلوچستان ریذیڈنشل کالج لورالائی نا تعلیمی دورہ غا بروک طالب علم آتون اوڑدہی ٹی گپ وتران کریکہ۔ صدر ڈاکٹر عارف علوی پارے کہ قدرتی وسیلہ غاتیان پبی فائدہ ہرفنگ کن انسانی وسیلہ غاتیا زرکاری کروئی مریک، بلوچستان نا انسانی وسیلہ غاتا شونداری آ چکارآن ہی ترند رفتار شونداری ممکن ءِ۔ اوپارے کہ انفارمیشن ٹیکنالوجی و مصنوعی ذہانت نا ہر بشخ اٹی اطلاق ودنگ ءِ، انفارمیشن ٹیکنالوجی نا بشخ انا مون آ دننگ آن پاکستان گونڈ مد اٹی زرگزرانی شونداری کننگ کیک۔ اوپارے کہ بلوچستان نا طالب علم آک تندہی و لگن اٹ علم دوئی کیر، طالب علم آک نصاب آن بیدس کتب بینی و علم انا دوئی کننگ آ چکارتخر، مستین اٹ علم انا دوئی کننگ مشکل ئس، پوسکن آ ٹیکنالوجی آن علم اسکان رسینگ ودفینن۔ صدرڈاکٹر عارف علوی پارے کہ بلوچستان قدرتی وسیلہ غاتا دولت آن مالامال ءِ، شونداری کن گام گیج کننگ انگ ءِ۔ ڈل صدر مملکت ءِ بلوچستان نا تعلیمی بشخ اٹی کالج نا خذمت آتا بارواٹی معلومدارکرساپارے کہ کالج نا فارغ التحصیل سد آ طالب علم آک طب، انجینئرنگ ، سول سروس، دفاع، کانود و کاروبار تون اوار چندی بشخ آتیٹی نمان خذمت سرتننگ ءُ۔ صدر مملکت بلوچستان اٹی تعلیم نا مون آ دننگ اٹ کالج نا کڑد انا ستاءِ کرے۔