سرسہبی پاکستان نا مقدر ءِ، پاک فوج لمہ وطن نا رکھ انا مقدس فرض ءِ دترنا آخیریکو پُڑی اسکان ادا کرسا کیک، جنرل سید عاصم منیر

راولپنڈی۔ 07 دسمبر (اے پی پی) پاک فوج انا سروک جنرل سید عاصم منیر پارینے کہ سرسہبی پاکستان نا مقدر ءِ پاک فوج لمہ وطن نا اسہ اسہ انچ انا رکھ انا بے لوث و مقدس فرض ءِ دترنا آخیریکو پڑی اسکان ادا کرسا کیک، پاکستان نا امن وسوگوی کن دشمن واکدار آتا ناپاک عزم ءِ ہم گرنچی و جوان حکمت عملی نا کمک اٹ بے سہب کننگ انگءِ۔ آئی ایس پی آر نا رداٹ او پشاور دورہ نا وخت آ تران کریکہ۔ آرمی چیف ءِ سیکورٹی نا جم حالیت، انسداد دہشت گردی نا برخلاف برجاکارروائی، غیرکانودی وڑاٹ رہینگوک درملکی تا وطن آ واپسی و پوسکن اوار مروک ضلع غاتیٹی راجی و اقتصادی شونداری نا پیش رفت نا بارواٹی سرجمی اٹ حوال تننگا۔ آرمی چیف انسداد دہشت گردی نا چندی کارروائی تیٹی نرزوری نا درشانی ءِ کروک آ پاک فوج انا آفیسر و سپاہی تتون گپ وتران کرے۔ آرمی چیف اوفتا نرزوری و مثالی سرسہبی تا ستاءِ کرسا پارے کہ قوم  تینا فوج آ گمر کیک و او فوج انا سرسہبی تے ہم امنا کیک۔ جنرل سید عاصم منیر پارے کہ سرسہبی ننا مقدر ءِ، پاک فوج لمہ وطن نا اسہ اسہ انچ انا رکھ انا تینا بے لوث و مقدس فرض ءِ دترنا آخیریکو پڑی اسکان ادا کرسا کیک۔ آرمی چیف اولیکو قومی ورکشاپ خیبرپختونخوا(NWKP-1)نا بشخ ہلوک آتیان ہم تران کرے۔ تینا تران اٹی آرمی چیف پارے کہ سیکورٹی فورس آتے خیبرپختونخوا نا غیرتی الس آ عزم حمایت نا سوب ہی صوبہ ٹی سوگوی و راجی و اقتصادی شونداری نا ڈٹ آتیا پیش رفت دوئی مسنے۔ آرمی چیف پارے کہ پاکستان نا امن و سوگوی نا برخلاف دشمن واکدار آتا ناپاک عزم ءِ ہم گرنچی و جوان حکمت عملی نا کمک اٹ بے سہب کننگ انگ ءِ۔ آرمی چیف پوسکن اوار مروک ضلع غاتیٹی اقتصادی شونداری نا اہمیت ءِ ہم تالان کرے۔ آرمی چیف داہیت ءِ ہم مون آتخا کہ غیرکانودی وڑاٹ رہینگوک درملکی پاکستان نا سلامتی و زرگزران ءِ بھاز بے وڑ زہمی کننگ ءُ، اوفتا وطن آ پدی ہِننگ نا فیصلہ  ءِ حکومت ملک انا گیشترفائدہ غاتیٹی کرینے ، غیرکانودی درملکی تے طے مروک اصول آتا رداٹ شرفمندی اٹ اوفتا ملک آ پدی گدریفنگ انگ ءِ۔ داکان مست بننگ آ کورکمانڈر پشاور آرمی چیف ءِ بخیرکرے۔