گچین کاریک 8 فروری آ مریرہ، داباروٹ کس اسے شک و شبہ مف، نگراں بنجائی وزیر حوالکاری مرتضیٰ سولنگی نا پریس کانفرنس

کراچی۔ 07 دسمبر (اے پی پی) نگراں بنجائی وزیر حوالکاری، شینکاری وپارلیمانی امور مرتضیٰ سولنگی پارینے کہ گچین کاریک 8 فروری آ مریرہ ، دابارواٹ کس اسے شک و شبہ مف ، جماعت اسے اقتدار اٹ اتنگ نا فیصلہ ءِ کننگ نا اختیار الس نا ءِ، الیکشن کمیشن نا مالی، انتظامی و سیکورٹی گرج آتے پورو کینہ۔ داہیت ءِ او پنچ شنبے نادے آ داڑے نگراں صوبائی وزیر حوالکاری احمد شاہ تون اوار پریس کانفرنس آن تران کرساپارے۔ مرتضیٰ سولنگی پارے کہ ننا کوشست مریک کہ بنجائی و صوبائی حکومت آتا نیام اٹ رابطہ نا ہچ ءُ کمتی اس مف، دا بابت صوبائی وزیر حوالکاری تتون اواری اٹ حکمت عملی اس شین ایتنہ۔ اوپارےکہ کس اسے اقتدار اٹ اتنگ نا فیصلہ ءِ کننگ نا اختیار الس نا ءِ، پاکستان نا آئین نا تمہید اٹی نوشتہ ءِ کہ دا ملک ءِ اونا گچین مروک آنمائندہ غاک چلیفرہ۔ اوپارے کہ بھلا پالیسی فیصلہ غاتا کننگ گچین مروک پارلیمان نا کاریم ءِ ، ننا کوشست ءِ کہ ہراتم آن ننے حکومت رسینگانے، اوکان پد آن حالیت آک خراب مفس، نن گچین حالیت اٹی ملک ءِ گچین مروک آ حکومت ءِ ایتنہ کانہ۔ اسہ سوج اسے نا ورندی ٹی نگران بنجائی وزیرحوالکاری پارے کہ الیکشن کرفنگ نا آئینی زمواری الیکشن کمیشن آف پاکستان نا ءِ ونن الیکشن کمیشن ءِ مالی و انتظامی کمک فراوان کننگ اُن۔ اسہ سوج اسےنا ورندی ٹی نگران بنجائی وزیر حوالکاری پارے کہ نگران وزیراعظم انوارالحق کاکڑ اِرا تُو انا گونڈ وخت اٹی کراچی نا کیہی دورہ غاتے کرینے، نگران وزیراعظم تدوک آ دے تیٹی کراچی نا دورہ ءِ کرے، داڑے اڈہم کرےو پوریاگرآتون اوڑدہی ہم کرے۔ اینو ہم وزیراعظم کراچی نا دورہ ءِ کننگ اٹی ءِ، اسٹاک ایکسچینج نادود اٹی بشخ ہلیک۔ اوپارے کہ نگران وزیراعظم نا صوبہ و چندی شار تیٹی ہِننگ نا جوان ءُ ریکارڈ اسے، نم داوڑ نا فرینڈلی وزیراعظم اس وخت اس ہم خنپرورے۔ اسہ پین سوج اسے نا ورندی ٹی مرتضیٰ سولنگی پارے کہ سیکورٹی نا خدشہ ہر گچین کاری تیٹی مسنے، 2008ء ٹی الیکشن مہم اٹی مسکوہی وزیراعظم گودی بینظیر بھٹو نا شہادت مسوسس، 2013ء نا گچین کاری تیٹی ہم سیکورٹی نا چیلنج ساڑی ئس۔ اوپارے کہ داسکان ہچ ءُ دُن ءُ حالیت اس ودی متنے ہرادے ننا سیکورٹی ادارہ غاک کنٹرول کننگ کپس۔