اسلام آباد۔ 07 دسمبر (اے پی پی) چیف الیکشن کمشنر سکندر سلطان راجہ پارینے کہ الیکشن کمیشن تینا غٹ آئینی و کانودی زمواری تیان جوانی اٹ بلد ءِ، نن شفاف و پرامن گچین کاری تا اڈتننگ کن پورو وڑاٹ تیار و سنبرینگوک اُن، الیکشن کمیشن نمے باور کرفک کہ الیکشن اٹی نمے پورو رکھ فراوان کننگک تانکہ نم پورو رازداری و شفافیت اتون تینا حق رائے دہی ءِ کاریم اٹ اتنگ کیر۔ داہیت انا درشانی ءِ او 7 دسمبر آ قومی ووٹرزڈے انا وخت آ تینا کلہواٹی کرے۔ قومی ووٹرز ڈے انا وخت آ الیکشن کمیشن الس آن خواست کرینے کہ ا و ملک وقوم انا روشنا آخبت کن تینا حق رائے دہی ءِ کاریم اٹ اتیر ۔الیکشن کمیشن تون کمک کیر، پرامن گچین کاری تا اڈتننگ ءِ پک کیر۔ الس یات تخے کہ نما دوٹی وونٹ انا طاقت ءِ۔ تینا و تینا چناتا آخبت ءِ مون آ تخسا تیناوونٹ ءِ کاریم اٹ اتیر۔ گچین کاری تا چرجوئی ٹی بے بنداو خبر و ہوکاتیا باور کپس۔ چیف الیکشن کمشنر تینا کلہو اٹی الس آن خواست کرینے کہ او گچین کاری عمل اٹی پبی بشخ ہلیر، دا الس نا حق ہم ارے و قومی فرض ہم۔ الیکشن کمیشن داوخت آ بروک آ لس گچین کاری تیٹی اختہ ءِ۔ گڈیکو گچین کاری فہرست آتا پرنٹنگ و فراوانی نا کاریم پورو مسنے۔ الیکشن کمیشن منہ دے اٹی ڈسٹرکٹ ریٹرننگ آفیسر، ریٹرننگ آفیسر و اسسٹنٹ آفیسرآتا نوٹیفکیشن جاری کننگ ءِ و داڑتون منہ دے اٹی الیکشن شیڈول تننگک و پولنگ 8 فروری 2024ء آ مریک۔
