کوئٹہ۔ 07 دسمبر (اے پی پی) چیئرمین اسٹینڈنگ کمیٹی پیٹرولیم و ریسورسز و سیاسی و اقتصادی امور نا ماہر سینیٹر محمد عبدالقادر اسہ خصوصی بیان اسے ٹی پارینے کہ پاکستان و عراق نا نیام اٹ دہائی آن سوگو ہڑتوم آکنڈآتا تعلقداری ءِ، ہڑتوم آ ملک آتا قومک مذہبی، دودوربیدہ ئی، اقتصادی و سفارتی رشتہ تون گنڈوک ءُ، چیئرمین قائمہ کمیٹی سینیٹر محمد عبدالقادر و چیئرمین سینیٹ صادق سنجرانی ئسک دادے تیٹی عراق نا اِرادے ئی دورہ غاٹی ءُ، ہراڑے اوفتا اوڑدہی عراقی اسمبلی نا اسپیکر تون مسنے۔ اوڑدہی ٹی تین پہ تینی است خواہی نا امور آ گپ وتران مس ، اوپارےکہ عراق ءِ اسلام اٹ بھاز اہمیت دوئی ءِ، پاکستان تون اوار مچ آ دنیا غان لکھ آ زائر ہرسال گل زمین عراق اٹ واقع مقدس ہند آتا زیارت کن حاضرمریرہ۔ زیار ت آتیان بیدس ہڑتوم آ ملک آتا نیام اٹ واپار ہم ہڑتوم آ ملک آتا زرگزران ءِ سوگوی تننگ نا سوب ءِ۔ ہڑتوم آ شخصیت آتا عراقی اسپیکر تون اوڑدہی ٹی تین پہ تینی است خواہی نا امور آ گپ وتران کننگا۔ اوپارے کہ پاکستان وعراق نا نیام اٹ بے کچ خوشگوار تعلقداری ساڑی ءِ ، پاکستان و عراق نا نیام اٹ تین پہ تینی واپار نا مون آ دننگ آ گپ وتران مس و ہڑتوم آ کنڈآتا پت انا درشانی ءِ۔عراقی حکومت پاکستان تون مدام گہری است خواہی نا درشانی ءِ کرینے ہنداوڑ دے ٹک نیامی نا ایلو ملک آتیکن ہم پاکستان اٹ زرکاری نا بابت ترغیب ودی مسنے۔ چیئرمین قائمہ کمیٹی مستی پارے کہ پاکستان نا عراق تون سوگو تعلقداری پوسکن آ بڑزی تے سرمننگ ءِ، عراق نا زرکارآک پاکستان اٹ زرکاری ٹی است خواہی تخرہ، ساڑی آ سال تیٹی دے ٹک نیامی نا ملک آک پاکستان اٹ بھلو زرکاری اسے نا عندیہ تسنو ، ہڑتوم آملک آک دازرکاری نا فضاءِ مون آ دننگ اٹ ممدو کمکار جوڑ مننگ ءِ، پاکستان عراق تون تینا تعلقداری تا مون آ دننگ نا خواہندار ءِ ۔
