اسلام آباد۔ 06 دسمبر (اے پی پی) صدر مملکت ڈاکٹر عارف علوی پارینے کہ چیلنجنگ جہانی منظرنامہ ٹی پاکستان ءِ علاقائی امن ءِ مون تروک خطرہ غاتون مون تننگ کن متحرک اندازِ فکر ءِ تینا کننگ نا گرج ءِ، دنیا داوخت آ مہرومریبت ، ہمدردی و معافی نا نقطہ نظر ءِ بایدے تیناکے، غزہ نا حالیت دنیا نا بے حسی نا تشویشناک علامت ءِ ہرازالبول و چناتتون اوار کودک مخلوق نا کشت وخون ءِ توننگ کتنے۔ داخیال آتا درشانیءِ او چارشنبے نادے آ داڑے انسٹی ٹیوٹ آف سٹریٹجک سٹڈیز اسلام آباد (آئی ایس ایس آئی ) ناکنڈآن اسلام آباد کانکلیو2023نا بنائی دیوان آن تران کرساکرے۔ صدر مملکت پارےکہ پاکستان ءِ سپرپاورآتا دشمنی و ہمسایہ ریاست آتا نیام تمنگ نا رداٹ شعوری وڑاٹ تینا وژنءِ دُوارہ دریافت کروئی مریک، اوداچرجوئی ٹی سیاست دان و پارلیمنٹ نا باسک، وزارت خارجہ و وزارت دفاع نا نیام اٹ جوان گپ وتران و پالیسی سازی کن خڑکی رابطہ غا زور شاغا۔ صدر مملکت پارے کہ پاکستان نا جغرافیائی سیاست آن جیواکنامک نا کنڈآ سٹریٹجک بدلی و بھارت ناجارحیت نا رداٹ پالیسی تا گرج ءِ۔ اوپارےکہ اینو مہذب دنیا اخلاقیات نا اصول آتے فراموش کرینے و واکدار نا کنڈآن نزور تپہ غاتا برخلاف تروک آ جنگ آتا مشاہدہ ءِ کننگ ءِ۔
