ترجمان دفترخارجہ نا تاریخی  بابری مسیت نا 31 می یوم شہادت نا وخت آ بیان

اسلام آباد۔ 06 دسمبر (اے پی پی) پاکستان بھارتی حکومت آ زور شاغانے کہ او اقلیت خاص وڑاٹ مسلمان و اوفتا عبادت گاہ تا رکھ، سلامتی و رکھ ءِ پک کے۔ ہندو انتہاپسند آتا دُو تاریخی بابری مسیت نا 31 می یوم شہادت نا وخت آ ترجمان دفترخارجہ چارشنبے نادے آ تینا بیان اٹی پارے کہ اینو بھارت اٹ تاریخی ’’بابری مسیت‘‘ نا انہدام نا اسہ افسوزناک یات دہانی اسے، اینونادے 31 سال مست بھارتی کانود نافذ کروک آکمامدارآتا ساڑی گری ٹی ہندو جنونی تا اسہ مچی اس ایودھیا ٹی د اپیڑی تیا متکن آمسیت ءِ منہدم کریسس۔ بیان اٹی پاننگانے کہ افسوزناک ہیت دادے کہ  بھارت نا بڑزکو عدلیہ داخارتس فعل انا زموار ڈوہدار تے نئے بیرہ بری کرے بلکن مسمار کروک آ مسیت نا جاگہ غا مندر نا تفنگ نا ہم موکل تس۔ ترجمان تینا بیان اٹی مستی پارے کہ بھارت اٹی بروک آ لس گچین کاری تیان منہ تُو مست دا مندر نا بناءجنوری 2024اٹی گمانی ءِ۔  بیان نا رداٹ بابری مسیت نا شہیدی نا سوب جوڑ مروک آ مسلم مخالف جنون پدریسہ برجاءِ ، منہ ہفتہ مست بھارتی ریاست اترپردیش ناوزیراعلیٰ داہیت انا الس اٹ پاش آن پاش درشانی  ءِ کرے کہ مسیت نا انہدام پاکستان نا گڑاس بشخ آتیا دُوارہ دعویٰ کننگ نانمونہ نا وڑاٹ کننگا۔ بیان اٹی پاننگانے کہ بھارت اٹی حکمران تپہ غان تعلق تخوک آ زموار آک مسلمان تا برخلاف ہسٹیریا و خار ءِ تہو تننگ ءُ، اینو ہندوبالادستی کن سرگرم گروہ ایلو چندی مسیت آتے مندر آتیٹی بدل کننگ نا خواست کننگ ءُ ہرافتے ٹی وارانسی نا گیانواپی مسیت و متھرا ناشاہی عئید گاہ مسیت اوار ءُ۔ بیان نا رداٹ چندی مسیت و مزار آتا چندی انتظامی گام گیج یا عدالتی عمل نا آڑاٹی مہالو آن مسمار کننگانے۔ مسلمان تا مقدس ہند آتے ہم انتہاپسند آتا مچی نا جلہو آتا شست ءُ، دفترخارجہ پارے کہ جہانی برادری بھارت اٹ ودوک آ اسلاموفوبیا، خارتس تقریر، و خارتس ڈوہ تا نوٹس ءِ ہلے۔ بیان اٹی پاکستان بھارتی حکومت آ زور شاغا کہ او اقلیت خاص کر مسلمان و اوفتا عبادت گاہ تا رکھ، سلامتی و رکھ ءِ پک کے۔