کوئٹہ۔ 06 دسمبر (اے پی پی) گورنر بلوچستان ملک عبدالولی خان کاکڑ پارینے کہ اینو نن انتس ملٹری کالج سوئی ڈیرہ بگٹی ٹی طالب علم آتا قابلیت و ادارہ نا کارکڑد نا بابت ہُننگ اُن، دا اصل اٹ اسہ تغ اسے نا پوروی ءِ ہراڑکن دُوانزدہ سال مست دا کالج ءِ جوڑ کننگاسس۔ داہیت پک ءِ کہ ہندا کیڈٹ آتا شاندار سرسہبی ملٹری کالج سوئی نا روشنا آخبت نا ضمانت ءِ۔ داخیال آتا درشانی ءِ او چارشنبے نادے آ ملٹری کالج سوئی ڈیرہ بگٹی ٹی اڈ ہلوک دود انا بشخ ہلوک آتیان تران کرساکرے۔ دا وخت آ بریگیڈیئر وسیم قیصر کمانڈنٹ ملٹری کالج سوئی، فیکلٹی ممبرز و کیڈٹ آتون اوار لمہ و باوہ غاتا اسہ بھلو کچ اس ساڑی ئسر۔ دود آن تران کرسا گورنر بلوچستان پار کہ نن زوت سوئی ملٹری کالج اٹی آڈیٹوریم نا تفنگ واٹریکشن الاؤنس نا منظوری ءِ پک کینہ۔ ملٹری کالج سوئی نا ہُشار کیڈٹ آتا کارکڑد و پت آ خوشی نا درشانی ءِ کرسا اوپارےکہ اینو لمہ وباوہ غاتا دے انا بابت اڈہلوک سرسہب دود و ملٹری کالج سوئی نا عمدہ کارکڑد آ بریگیڈیئر وسیم قیصر و اونا مچ آ ٹیم خراج تحسین نا حقدار ءِ وخت بسنے کہ نن تینا پوسکن آ چین نا جونی و ذہنی لائخی تے ملک و قوم انا فائدہ ٹی کاریم اٹ اتین، تربیت نا بابت استاد آتون اوار اوار لمہ و باوہ غاتا کمک و راہشونی ہم بھا ز المی ءِ۔ گورنر بلوچستان لمہ و باوہ غاتیا زور شاغا کہ نم تینا چناتے جوان تعلیم و تربیت نا چرجوئی ٹی کالج انتظامیہ تون خڑکی رابطہ تخبو و کیڈٹ آتا کڑد سازی و اخلاق ءِ جوڑ کننگ اٹ تینا پبی کڑد ءِ ادا کیر۔
