کوئٹہ۔ 06 دسمبر (اے پی پی) پاکستان پیپلزپارٹی کوئٹہ ڈویژن نا صدر خیرمحمد ترین پارینے کہ بروک آ گچین کاری تیٹی پاکستان پیپلزپارٹی بلوچستان تون اوار مچ آملک آن بھلو گیشتری اسے اٹ سرسہبی دوئی کیک، چیئرمین بلاول بھٹو زرداری و آصف علی زرداری پاکستان نا سیاست کن زیل ءُ سُوآنبار ءُ۔ داڑے جاری مروک اسہ بیان اسے ٹی اوپارے کہ پاکستان پیپلزپارٹی نا حکومت مملکت پاکستان ءِ زرگزرانی ویل آتا مین آن کشنگ کیک ،پاکستان نا الس پاکستان پیپلزپارٹی ءِ نجات دہندہ امنا کرینے، اوپارےکہ بروک آ گچین کاری تیٹی پاکستان پیپلزپارٹی بھلو گیشتری اسے اٹ سرسہبی دوئی کرسا پاکستان اٹ سلوک آ شونداری وشونہالی نا سفر ءِ سرسہبی اٹ اسہ وار ولدا جاری وساری کیک ، بلاول بھٹو زرداری پاکستان نا وزیراعظم گچین مریک۔ اوپارےکہ بلاول بھٹو زرداری ہی پاکستان ءِ غٹ تر ویل آتیان خلاصی ترفنگ نا لائخی تخک۔ اوپارے کہ پاکستان پیپلزپارٹی شہید وغازی تا جماعت ءِ ہراملک خداداد پاکستان کن تینا جون تے ندر کرسا جمہوریت ءِ سوگو کریر اِرغ پچ، ہند انانعرہ ءِ عملی ءُ دروشم اس تننگا۔ اوپارے کہ کوئٹہ ٹی پاکستان پیپلزپارٹی نا کنڈآن مروک آ سرسہب جلسہ غان مخالف آتا تغ حرام مسنے و الس جلسہ ٹی پبی بشخ ہلسا دا کلہو ءِ تسنو کہ بلوچستان نا الس پیپلزپارٹی تون تفوک ءُ۔
