کوئٹہ۔ 06 دسمبر (اے پی پی)چیئرمین اسٹینڈنگ کمیٹی پیٹرولیم و رسورسز و سیاسی و اقتصادی امور نا ماہر سینیٹر محمد عبدالقادر پارینے کہ پاکستان وچین نا نیام اٹ سدابہار اسٹریٹجک شریداری دے پہ دے زیات مرسا کننگ ءِ، گوادر اٹی چین پاکستان سنگتی ہسپتال و سمندری دیر ءِ کاریم اٹ اتنگ نا قابل جوڑ کننگ نا پلانٹ شار انا مخلوق کن نعمت اسے آن کم اف، سی پیک تون گنڈوک پروجیکٹ آک گوادر نا الس کن آسانی فراوان کننگ اٹی ءُ۔ داڑے جاری مروک اسہ بیان اسے ٹی سینیٹر محمد عبدالقادر پارے کہ چین پاکستان سنگتی ہسپتال و سمندری دیر ءِ کاریم اٹ اتنگ نا قابل جوڑ کننگ نا پلانٹ تون اوار سی پیک ڈٹ آتیان گوادر اٹی شونداری نا پوسکن آ دور بناکیک گوادر اٹی کیہی سال آن کنوئی آ دِیر انا گھمبیر ویل دا ڈٹ آن ایسر مریک پاکستان و چین سدابہار سنگت و آئرن سنگت ءُ اوفتا نیام اٹ مش آن بڑزو شاد آن ہنین سنگتی ءِ گوادر اٹی انٹرنیشنل کہول انا بالی پٹ فعال مننگ والا ءِ گوادر اٹی تعلیمی ادارہ خاص وڑاٹ میڈیکل کالج و یونیورسٹی نا جوڑ کننگ آن علاقہ نا طالب علم آتیکن بے کچ آسانی ودی مریک۔ اوپارےکہ سی پیک نا کمک اٹ گوادر نا مخلوق شونداری و شونہالی نا پوسکن آ دوراٹی داخل مریک اودے طاقت و دہشت گردی اٹ بدل کننگ مفک ، سی پیک آن بلوچستان نا زرگزرانی شونداری نا سمت سہی مننگ ءِ شونداری کن سہی سمت انا تعین مننگ آن پد سفراٹ تفنگک، مزاحمت کننگپک، بروک آ منہ سال اٹی پاکستان و چین اتون اوار مچ آ ڈیہہ اٹی کھرب آ ڈالر آتا واپار مریک داواپار اٹی تینا شریداری اونا بشخ مننگ کن و اوٹی اواری کن تیاری کروئی مریک۔ چیئرمین قائمہ کمیٹی پارے کہ سولر پینل ڈٹ و کوئٹہ ٹی ایمرجنسی سینٹر نا جوڑ کننگ بھاز اہمیت تخک، گوادر پورٹ آن مست کراچی پورٹ آ بے تحاشا پریشر ئس ولے گوادر پورٹ انا آپریشنل مننگ تون اوغان و نیامی ایشیائی ریاست آتا واپار نا بھاریم گوادر پورٹ آ بریک گوادر پورٹ نا کچ آخبت نا واپاری سرجزآتا احاطہ ءِ کننگ کن سہی ءِ۔
