اسلام آباد۔ 05 دسمبر (اے پی پی) نگران وزیراعظم انوارالحق کاکڑ پشاور اٹی وارسک روڈ آ دھماکہ نا ترندی اٹ مذمت ءِ کرسا ٹھپی تے گچین طبی آسراتی فراوان کننگ نا پارت کرینے۔ سے شنبے نادے آوزیراعظم آفس نا میڈیا ونگ انا کنڈآن جاری بیان نا رداٹ وزیراعظم کانود نافذ کروک آ ادارہ غاتے واقعہ نا جاست وپاست ءِ زوت پورو کننگ نا پارت کرے۔ اوپارےکہ دہشت گرد آتا پاکستان نا امن ءِ بھس کننگ نا ناپاک عزم ءِ وخت اس ہم سرسہب مننگ کن اِلیپنہ، ملک آن دہشت گردی نا ناسور نا چٹفنگ اسکان جنگ ءِ برجاتخنہ۔ اوباوری کرفے کہ واقعہ نا زموار آتا زوت آن زوت پیدواری ءِ کرسا اوفتے سخت سزاترفنگک۔ وزیراعظم دھماکہ ٹی ٹھپی مروک آ چناتا زوت دراخ جوڑی کن دعا کرے۔
