اسلام آباد۔ 05 دسمبر (اے پی پی) صدر مملکت ڈاکٹر عارف علوی زالبول آتے زیزاریفنگ آن پاک چاگڑد اس فراوان کننگ کن اجتماعی کوشست آتیا زور شاغسا پارینے کہ زالبول آتے زیزاریفوک آ چاگڑد و رویہ ءِ بدل کروئی مریک، السی ہند، بمقام کار و اُراتیٹی ہم سازگار چاگڑد ءِ پک کروئی مریک۔ او سے شنبے نادے آ بنجائی محتسب انسداد ہراسیت بمقام کار نا کنڈآن دود آن تران کریکہ۔ خاتون اول بیگم ثمینہ علوی ، بنجائی محتسب انسداد ہراسیت فوزیہ وقار، ڈپٹی گورنر سٹیٹ بینک سلیم اللہ، چندی ملک آتا سفارتکار و انسانی حق انا تنظیم تا نمائندہ غاک دود اٹی ساڑی ئسر۔ صدر مملکت ڈاکٹر عارف علوی دود آن تران کرسا پارے کہ دیکی راج اٹی بھاز پد زالبول آتا حق انا ہیت مسنے، 1400 سال مست خواجہ محمد صلی اللہ علیہ وآلہ وسلم و قرآن پاک زالبول آتا حق پاریسس، اگہ دیکی تون موازنہ ءِ کین تو نن زالبول آتا ہمو گوہنگوک آ ہند ءِ دوئی کننگ کن کوشست کننگ اُن ہرادے 1400 سال مست قرآن و سنت زالبول آتے تسوسر۔ صدر مملکت مولانا محمد علی جوہر وشوکت علی نالمہ، اماں بی ن اکڑد ءِ ہرن یا قائد اعظم محمد علی جناح نا رتی جناح اتون اوار ہِننگ، پاکستان نا جوڑ مننگ آن پد گودی فاطمہ جناح وپاکستان نا سیاست اٹی بینظیر بھٹو کون آ زالبول آتا کڑد نمان نظر بریک، پاکستان نا تہہ ٹی ارتقائی عمل برجاءِ، وخت اتون اوار اوار زالبول آتا ہند بڑزمرسا برساکرینے۔ اوپارے کہ اسہ بشخ اسے سہی کننگ کن بھاز انگا مالی گرج مریک ولے زالبول آتے واکدار کننگ کن ننے بیرہ تینا رویہ غاتیٹی بدلی نا گرج ءِ۔
