اسلام آباد۔ 05 دسمبر (اے پی پی) نگران بنجائی وزیر حوالکاری، شینکاری وپارلیمانی امور مرتضیٰ سولنگی پارینے کہ تمباکونوشی آن ہر شش سیکنڈ آن پد اسہ بندغ اس کہیک، ہرسال 50 لکھ بندغ جون تیان دوتے سلرہ وخت اس کہ بیست می صدی ٹی 10 کروڑ بندغ تمباکونوشی آن تینا زندآن محروم مسر۔ داخیال آتا درشانی ءِ او چناتے تمباکونوشی نا اثر و نسخان تیان آگاہی فراوان کننگ نا دود آن تران کرسا کرے۔ نگران بنجائی وزیر حوالکاری پارے کہ تمباکونوشی نا بابت گڑاس ہم سوج آتا اَرفنگ بھاز المی ءِ، داہندن ءُ ناجوڑی اسے ہرانا سوب آن کم از کم ہر شش سیکنڈ آن پد اسہ بندغ اس کہیک وخت اس کہ ہر دہ بندغ آتیان اسہ بندغ اسے نا مرک تمباکونوشی نا سوب آن مریک۔ اوپارے کہ بیست می صدی ٹی تمباکو نوشی نا سوب آن 10 کروڑ مخلوق تینا زند آن محروم مسر۔ مچ آ دنیا ٹی سالانہ 50 لکھ مرک تمباکونوشی آن مریک۔ اوگڑتی ظاہر کرے کہ تمباکونوشی نا جنگ ہندا ترندی اٹ برجاسلیس تو 2030ء اسکان داڑان کہوک آتا کچ 50 لکھ آن ودسا 80 لکھ اسکان سرمریک۔ مرتضیٰ سولنگی تمباکونوشی نا برخلاف جنگ انا ہیروتے سلام پیش کرسا پارے کہ تمباکو نوشی نشہ اس آخا مرک انا گولی اسے، دا انسانی زنداکن خطرہ اسے۔ اوپارے کہ ہراڑے ایلو جان جوڑی کن نسخاندہ گڑاتا ذکر ءِ کننگک ہموڑے تمباکونوشی نا ذکر ہم مرے۔ اوپارے کہ تمباکو آ خراج آتیٹی ودکی اونا حوصلہ شکنی کن المی ءِ، چاگڑدی بھسکاری آنبار تمباکونوشی ہم انسانی زند اکن خطرہ اسے، دانا اثرآتے نن ہڑدے تینا زنداٹی خننہ۔ اوپارے کہ تمباکو نوشی نا سوب آن جان جوڑی نا بشخ اٹی خڑچ آتیٹی ہم ودکی مریک۔ مرتضیٰ سولنگی پارے کہ ہراتم او وزیر الوکہ ہموتم آ ہم تمباکونوشی تون جنگ کروک آ ہیروتا مخ تف ئس، اینوہم ارین و پین وخت اس ہم مخ تف مرینہ۔
