اسلام آباد۔ 05 دسمبر (اے پی پی) انسٹی ٹیوٹ آف سٹریٹجک سٹڈیز اسلام آباد آئی ایس ایس آئی نا کنڈآن سالانہ اِرادے ئی ‘‘اسلام آباد کانکلیو’’ پگہ چارشنبے آ بناکیک ہرانا سرحال ‘‘ بدل مروک آ دنیا ٹی پاکستان’’ مریک۔ انسٹی ٹیوٹ آف سٹریٹجک سٹڈیز نا کنڈآن جاری بیان نا رداٹ‘‘اسلام آباد کانکلیو درملکی و پاکستانی سرکڑدہ، پالیسی ساز و بڑزکو تعلیمی ادارہ غاتا چاہندار آتے اسہ یکتا ءُ پلیٹ فارم اسے آ یکجا کننگ کن موقع فراوان کیک۔ ‘‘ اسلام آباد کانکلیو’’ پیچیدہ سیاسی، سیکورٹی و اقتصادی ویل آتون اوار اوار پاکستان و ڈیہہ ءِ زہمی کروک آ روایتی و غیرروایتی خطرہ غاتا جاچ ءِ ہلنگ تون اوار اوار ردعمل و اختراعی ایسر اس سلاہ کننگ کن اسہ فورم اسے نا وڑاٹ کاریم کیک۔ اِرادے ئی دود انا ایسری سیشن آن بیدس 5 ورکنگ سیشن مریک ہرافتے ٹی پنچ جتا جتا ذیلی سرحال آتیا چکار کننگک۔ اول ورکنگ سیشن نا سرحال‘‘مون آ بروک جغرافیائی سیاسی حرکیات، مون آ بروک ٹیکنالوجی و تزویراتی سوچ اٹی بدلی’’مریک ہرادے (آئی ایس ایس آئی) نا آرمز کنٹرول اینڈ ڈس آرمانٹ سینٹر اڈ ایتک۔ ارٹ میکو ورکنگ سیشن ‘‘علاقائی منظرنامہ نا بدلی: اوغانستان آن دے ٹک نیامی اسکا’’ نا بست وبند ءِ سینٹر فار اوغانستان، مڈل ایسٹ اینڈ افریقہ کننگ ءُ۔ داپاکستان و اہم ہمسایہ ملک خاص وڑاٹ اوغانستان و دے ٹک نیامی نا نیام اٹ مون آ بروک تعلقداری آ چکار کیک۔ دانا بست وبند ءِ چائنا پاکستان سٹڈی سینٹر کننگ ءِ۔ چارمیکو ورکنگ سیشن نا سرحال‘‘جامع سیکورٹی ان اے ورلڈ ان فلوکس’’ مریک۔
