راولپنڈی۔ 05 دسمبر (اے پی پی) ملک انا بڑزکو عسکری سرکڑدہ غاک میجر محمد اکرم شہید، نشانِ حیدر ءِ اونا 52 می شہیدی نا برسی آ شاندار خراج عقیدت پیش کرساپارینو کہ ببو ہموہیروتے یات تخن ہرافک لمہ وطن نا دفاع ٹی تینا جون تے ندر کریر، قوم تینا نرزور مارتیاگمرکیک۔ آئی ایس پی آر نا رداٹ چیئرمین جوائنٹ چیفس آف اسٹاف کمیٹی جنرل ساحرشمشاد و ہرمسٹ آ فوج انا سروک آک میجر محمد اکرم شہید، نشانِ حیدر ءِ اونا 52 می شہیدی نا برسی آ شاندار خراج عقیدت پیش کریر۔ اوفتا پاننگ ئس کہ غٹ مشکل آتیان پد ہم نرزوری نا درشانی ءِ کرسا میجر محمد اکرم شہید 1971نا جنگ اٹی دشمن نا ان گنت جلہو آتے نرزوری اٹ پسپاکرے۔ میجر اکرم نا دا بے مٹ مزاحمت ہندوستانی فوج ءِ ہمووخت اسکان لمہ وطن نا اسہ انچ اس ہم مون آ ہِننگ کن اِلیتو۔ داوڑنا بے مٹ جیرت ننا لمہ وطن نا محافظ آتا پہچان ءِ۔ عسکری سرکڑدہ غاک پاریر کہ میجر محمد اکرم نا یوم شہیدی لمہ وطن نا دفاع کن پاکستان نا فوج انا کنڈآن تروک آ بھلا قربانی تا یات دہانی نا وڑاٹ کاریم کیک۔
