’’چین پاکستان دوستی ہسپتال‘‘ و سمندری دیر ءِ کاریم اٹ اتنگ نا قابل جوڑ کننگ نا پلانٹ اتون اوار سی پیک ڈٹ آتیان گوادر اٹی شونداری نا پوسکن آ دور بناکیک، نگران وزیراعظم انوارالحق کاکڑ نا دود آن تران

گوادر۔ 04 دسمبر (اے پی پی) نگران وزیراعظم انوارالحق کاکڑ پاک چین سنگتی نا ستاءِ کرسا پارینے کہ ’’چین پاکستان دوستی ہسپتال ‘‘ و سمندری دیر ءِ کاریم اٹ اتنگ نا قابل جوڑ کننگ نا پلانٹ تون اوار سی پیک ڈٹ آتیان گوادر اٹی شونداری نا پوسکن آ دور بناکیک، گوادر اٹی کیہی سال آتیان کنوئی آ دیر انا گھمبیر وی دا ڈٹ آن ایسر مریک، آخبت اٹ چین اٹی کھرب آ ڈالر نا واپار آن فائدہ ہرفنگ کن ننے خاص وڑاٹ ورناتے تیاری کروئی مریک و دااوفتے کن جوان ءُ موقع اسے کہ او تینا ملک، صوبہ و خاہوت آتیکن داڑآن فائدہ ہرفر۔ داخیال آتا درشانی ءِ او دوشنبے نادے آ داڑے’’چین پاکستان دوستی ہسپتال‘‘ و سمندری دیر ءِ کاریم اٹ اتنگ نا قابل جوڑ کننگ کن بنائی دود آن تران کرساکرے۔ وزیراعظم پارے کہ بلوچستان تون  است انا رشتہ ءِ ، بی آر آئی فورم نا وخت آ چینی کمامدارآتا اردو آن گچین شناسائی آ خوشی مس، زبان و رابطہ غاتیان اِرا ملک آتا نیام اٹ  قربت سوگو مریک۔ اوپارے کہ پاکستان و چین سدابہار سنگت و آئرن فرینڈز ءُ، اوفتا نیام اٹ مش تیان بڑزو شاد آن ہنین سنگتی ءِ پاکستان و چین نا نیام اٹ ہڑتوم آکنڈآتا سوگو و دوستانہ تعلقداری ءِ۔ اوپارے کہ چین تینا الس نا بھلو کچ اسے نیزگاری آن کشسا بے مٹ کارنامہ سرتس۔ صدر شی جن پنگ تینا قوم ءِ ہرا بردباری اٹ پوسکن آ ریسہ غاتا کنڈآ دننگ ءِ او سفت نا قابل و ستاکڑزنگ نا قابل ءِ۔ اونا کلہو دادے کہ ہراتم چین شون ہلیک تو غٹ شون ہلیرہ، داٹی پاکستان خاص وڑاٹ بلوچستان اٹی گوادر غٹ آن مست بریک، گوادر اٹی کنوئی آ دیر انا ویل کیہی سال آن گھمبیر ئس۔ دا ڈٹ آن کنوئی آ دیر انا ویل بھلو حداسسکان ایسر مریک۔ بالی پٹ فعال مننگ والا ءِ،سی پیک ناکمک اٹ گوادر نا مخلوق شونداری نا پوسکن آ دور اٹی داخل مریک۔ دادے طاقت ودہشت گردی اٹ بدل کننگ مفک، داوڑسجفوک آ غلطی آٹی ءِ، قومی گچینی کن درست سمت انا تعین مننگ آن پد سفر اتون تفنگک، مزاحمت کننگپک۔ اوپارے کہ گوادر و بلوچستان نا شاری تیکن آبادی نا رداٹ وارخواہی و وسیلہ غاک زیات ءُ، بروک آ دہ سال اٹی چین و اونا کیبی ٹی کھرب آ ڈالر نا واپار مریک۔ داواپار اٹی تینا شریداری ، اونا بشخ جوڑ مننگ کن واوٹی شمولیت کن تیاری کروئی مریک۔ اوپارے کہ ہربندغ اٹ چندی قابلیت و لائخی مریک ہرا ہربندغ نا شناخت و کڑد انا تعین ءِ کیک، تینا پہچان آن زنداٹی سرسہبی ملک۔ اوپارے کہ دا بلوچستان نا الس خاص وڑاٹ ورناتیکن جوان ءُ موقع اسے کہ او تینا ملک، صوبہ وخاہوت آتیکن تاریخی موقع غان فائدہ ہرفر۔ اوپارے کہ سولر پینل ڈٹ و کوئٹہ ٹی ایمرجنسی سینٹر ناجوڑ کننگ نا پڑو آ چینی سفیر نا منت وار اُٹ و اودے باوری کرفیوہ کہ چینی باتی تا سیکورٹی گرج آتے پورو کننگ کن ہرممکن گام گیج کننگک۔ داوخت آ نگران وزیراعلیٰ بلوچستان علی مردان ڈومکی دود آن تران کرسا پارے کہ گوادر ناا لس ءِ کنوئی آ ساف دیر انا ویل مون تروک مسنے دا پلانٹ آن شاری تے 5 لکھ گیلن دِیر ملک۔سی پیک نا رداٹ گوادر نا شونداری و شونہالی بے مٹ ءِ۔ گوادر اٹی ہسپتال نا جوڑ کننگ داجاگہ نا الس کن ٹیکی اسے آن کم اف۔ پاکستان اٹ چین نا سفیر جیانگ ژائی ڈانگ دود آن تران کرسا پارےکہ بنجائی و بلوچستان حکومت نا ڈٹ آتیٹی پدریسہ کمکاری آ منت وار اُن۔ واٹر پلانٹ آن گوادر نا الس فائدہ ہرفک۔ ہسپتال نا جوڑ کننگ آن الس ءِ جان جوڑی نا گچین آسراتی دُوبریک۔ ننا مسخت سی پیک ڈٹ آتا وخت آ پوروی ءِ۔ گوادر پورٹ سی پیک نا اہم ڈٹ ءِ، سی پیک آن ملازمت آتا 2 لکھ 36 ہزار وارخواہی ودی مریک۔ گوادر سی پورٹ آ 46 کمپنی تا رجسٹریشن مسنے، دا ڈٹ آتیان ہڑتوم آملک آتا نیام اٹ کمکاری ءِ پین مون آ دننگک۔ اوبلوچستان اٹی سولر پینل ڈٹ وکوئٹہ ٹی ایمرجنسی سینٹر نا جوڑ کننگ نا پڑو ءِ ہم کرے۔ چیف ایگزیکٹیو آفیسر اے آئی ای سی او دود آن تران کرسا پارے کہ چینی حکومت گوادر نا شونداری کن پبی کڑد ادا کننگ اٹی ءِ۔ گوادر پورٹ ڈیہہ انا پوسکن آ بالی پٹ مریک ہراٹی پوسکن آسراتی میسر مریک۔ گوادر اٹی ووکیشنل ٹریننگ انسٹیٹیوٹ ورناتا تربیت اٹی اہم ءُ کڑد اس ادا کیک۔