اسلام آباد۔ 04 دسمبر (اے پی پی) نگران وزیراعظم انوارالحق کاکڑ پارینے کہ پاکستان و متحدہ عرب امارات مڈل ایسٹ نارتھ افریقہ ریجن اٹی غٹ آن بھلا واپاری شریدارءُ، و اوفتا سلانہ اوسط واپار نا کچ 9 ارب ڈالر ءِ، متحدہ عرب امارات نا زرکارآک پاکستان اٹی زرکاری نا پوسکن آ وارخواہی تیان فائدہ ہرفر۔ داخیال آتا درشانی ءِ او ’’گلف ٹوڈے‘‘ ءِ اسہ انٹرویو اسے ٹی کرے۔ وزیراعظم پارے کہ پاکستان و متحدہ عرب امارات نا نیام اٹ سوگو تعلقداری نا بنداو ءِ شیخ زید بن سلطان النہیان ایماندار تخاسس و وخت انا تدینگ انگ تون اوار دا تعلقداری پین کڑمب مرسا ہنا۔ اوپارے کہ متحدہ عرب امارات و پاکستان نا تعلقداری تزویراتی پلو آتا احاطہ ءِ کرینے۔ ہڑتوم آ ملک آتا سرکڑدہ غاتا نیام اٹ سوگو رابطہ، ہم گرنچی و چندی علاقائی و جہانی باندات آتیا اسہ ایلو تون خڑکی کمکاری ساڑی ءِ۔ نن تینا دا برادرانہ و کثیر الجہت تعلقداری تے واپار، زرکاری و الس نا نیام اٹ رابطہ غاتا مون آ دننگ نا کمک اٹ پین سوگو کننگ کن ہرممکن گام گیج کینہ۔ ہڑتوم آملک آتا نیام اٹ واپار نا بابت اسہ سوج اسے نا ورندی ٹی وزیراعظم پارے کہ متحدہ عرب امارات مڈل ایسٹ نارتھ افریقہ (مینا) ٹی پاکستان نا غٹ آن بھلا واپاری شریدار ءِ ہراڑتون واپار نا سالانہ کچ 9 ارب ڈالر ءِ۔ متحدہ عرب امارات ہموملک آتیٹی اوار ءِ ہراڑے پاکستان نا برآمد آک غٹ آن زیات ءُ۔ پاکستان ومتحدہ عرب امارات نا زرگزران ہڑتوم آ کنڈآتا ءِ۔ پاکستان متحدہ عرب امارات ءِ کشاری مصنوعات، ٹیکسٹائل و افرادی قوت گدریفک وخت اس کہ متحدہ عرب امارات آن پاکستان پیٹرولیم، پیٹروکیمیکل مصنوعات و ہائی ٹیک ایکوپمنٹ دوئی کیک۔ ہڑتوم آ ملک آتا نیام اٹ انفارمیشن ٹیکنالوجی، مصنوعی ذہانت و مالیاتی ٹیکنالوجی تون اوار چندی بشخ آتیٹی کمکاری ءِ ودفنگ نا گیشتر وارخواہی و گمان ساڑی ءِ۔ پاکستان و متحدہ عرب امارات نا نیام اٹ 2022-23اٹی ہڑتوم آکنڈآتا واپار نا کچ 9 ارب ڈالر ءِ وخت اس کہ 2022-23اٹی متحدہ عرب امارات کن پاکستان نا برآمدآک 1.4 ارب ڈالر اسکان سرمسنو ہرا تدوک آ پنچ سال اٹی غٹ آن زیات ءُ۔ یواے ای نا پاکستان اٹی زرکاری نا بابت سوج انا ورندی ٹی وزیراعظم پارے کہ پاکستان اٹ چندی بشخ آتیٹی پیشن نا زرکاری نا است بڈی ءِ کننگ حکومت نا اولیت آتیٹی اوارءِ۔ پاکستان اٹ یواے ای تون اوار دنیا نا چندی ملک آتیکن زرکاری و تیناکاروبار ءِ ودفنگ نا بھلو وارخواہی اس ساڑی ءِ و پاکستان زرکاری نا مون آ دننگ کن زرکار دوست پالیسی و جوان ءُ فریم ورک اس جوڑ کرینے و پیشن نا زرکاری نا است بڈی ءِ کننگ انگ ءِ۔ پاکستان ہروڑنا زرکاری نا ستاءِ کیک۔ اوپارے کہ پاکستان اٹی داوخت آ اسہ ہزار آن زیات ملٹی نیشنل کمپنی منافع کٹنگ ءُ و گیشتر جہانی کمپنیک پاکستان آن غٹ آن زیات منافع دوئی کننگ ءُ۔ درملکی کمپنیک بندغ و ملٹی نیشنل کارپوریشن پاکستان اٹی پورووڑاٹ تینا کاروبار نا بناءِ کننگ کیرہ و ہندی کہول آ شریداری ہم کننگ کیرہ۔ وزیراعظم پارے کہ پاکستان ومتحدہ عرب امارات نا نیام اٹ تاریخی، دودوربیدہ ئی و دوستانہ تعلقداری ءِ ولے ہڑتوم آ ملک آتا نیام اٹ زرکاری کمکاری ءِ ودفنگ نا گرج ءِ۔ کشت وکشار، توانائی ، کانڑکنی ، آئی ٹی، لاجسٹکس و ڈیفنس نا بشخ آتیٹی کمکاری ءِ ودفنگ نا گیشتر وارخواہی ساڑی ءِ۔
