اسلام آباد۔ 04 دسمبر (اے پی پی) نگران وزیراعظم انوارالحق کاکڑ اقوام متحدہ نا بیست ءُ ہشت می کانفرنس آف پارٹیز اٹی بشخ ہلنگ آن پد وطن آ پدی روانہ مس۔ دوشنبے نادے آوزیراعظم آفس نا میڈیا ونگ انا کنڈآن جاری بیان نا رداٹ دوبئی نا المکتوم جہانی بالی پٹ آ متحدہ عرب امارات نا وزیر مملکت گورنمنٹ دویلپمنٹ و فیوچر ایہودبنت خلفان الرومی، پاکستان اٹی متحدہ عرب امارات نا سفیر و پاکستانی سفارتی عملہ وزیراعظم ءِ رخصت کریر۔ دورہ ٹی وزیراعظم اقوام متحدہ نا بیست ءُ ہشت می کانفرنس آف پارٹیز اٹی پاکستانی ڈل انا کماشی ءِ کرے۔ وزیراعظم ورلڈ کلائمیٹ ایکشن سمٹ اٹی ہم بشخ ہلک و چاگڑدی بدلی نا بابت پاکستان نا قومی بیانیہ ءِ پیش کرے۔ وزیراعظم گلوبل اسٹاک ٹیک گول میز شرہ ٹی پاکستان نا موقف پیش کرے۔ کوپ۔ 28 نا وخت آ وزیراعظم انوارالحق کاکڑ سری لنکا و مالدیپ نا صدر، نیدر لینڈز، استونیا، شام انا وزیراعظم و بل اینڈ ملینڈاگیٹس فاؤنڈیشن نا کوچیئربل گیٹس اتون اوڑدہی کرے۔ وزیراعظم کوپ۔ 28 پاکستان پویلین نا دورہ ءِ ہم کرے، لیونگ انڈس انیشی ایٹو نا بابت دود اٹی بشخ ہلک و زید سسٹین ایبلیٹی پرائز نا ایوارڈ ءِ کٹوک آ پاکستانی طالب علم آتون اوڑدہی ہم کرے۔ کوپ۔ 28 اٹی وزیراعظم جہانی میڈیا ءِ تروک آ انٹرویوتیٹی موسمیاتی بدلی، ملک انا داخلہ، خارجی باندات، علاقائی و جہانی امور آ پاکستان نا موقف ءِ ہم تالان کرے۔ وزیراعظم دوبئی آن گوادرآسرمریک ہراڑے او چین۔پاکستان سنگتی ہسپتال و سمندری دیر ءِ ساف کرسا کاریم اٹ اتنگ نا قابل جوڑ کننگ نا پلانٹ نا بناءِ کیک۔
