اسلام آباد۔ 04 دسمبر (اے پی پی) بحریہ یونیورسٹی اسلام آباد اٹی اڈہلوک آ ورکشاپ نا بشخ ہلوک آ ک پارینو کہ پاکستان آن پیشن نا ملک تعلیم نا دوئی کننگ کن چین نا تعلیمی ادارہ غاتا گچین کاری نا بھلا سوب تعلیمی آب آ پورو سلنگ، بھلو کچ اسے آ پورو و جزوی اسکالر شپ، چین نا تعلیمی ادارہ غاتا جہانی درجہ بندی ٹی نمان مننگ و پاکستانی طالب علم آتے گچین چاگڑداس ملنگ اوار ءِ، داوخت آ ہم 30 ہزار آن زیات پاکستانی طالب علم چین نا تعلیمی ادارہ غاتیٹی خواننگ اٹی ءُ۔ دوشنبے نادے آ پاک چائنا سٹڈی اینڈ ریسرچ سینٹر، بحریہ یونیورسٹی آاسلام آباد و چائنا میڈیا گروپ نا کمک اٹ’’چین اٹی تعلیمی وارخواہی ‘‘ نا سرحال آ ورکشاپ اس اڈتننگا۔ ورکشاپ اٹی بحریہ یونیورسٹی آن بیدس ایلونمان یونیورسٹی تیٹی خوانوک آ سٹوڈنٹ ، فیکلٹی باسک و پیشن نا ملک تعلیم کن کنسلٹنسی سروسز فراوان کروک آ ادارہ و تعلیمی چاہندارآک بشخ ہلکر۔ پاک چائنا سٹڈی اینڈ ریسرچ سینٹر بحریہ یونیورسٹی نا ڈائریکٹر کموڈور(ر) عمران الحق پارے کہ پاکستان و چین نا تاریخی و بے مٹ سنگتی آن پورو وڑاٹ فائدہ ہرفنگ کن المی ءِ کہ داسہ داسنگتی ءِ پین مو ن آ دننگ نا ورناچین ءِ اسہ وڑ وارخواہی فراوان کننگے۔
