چاغی۔ 04 دسمبر (اے پی پی) بلوچستان نا نگران وزیرخزانہ ومال امجد رشید پارینے کہ پاکستان نا ہشت ءُ نیم لکھ ورناتے تدوک آ سال پیشن ناملک روزگار کن گدریفینن، بلوچستان نا ورناتے کسبکار کننگ و پیشن نا ملک گدریفنگ کن کاریم نا بناءِ کرینن، اولیکو ریسہ ٹی کوئٹہ نا 10 تعلیمی ادارہ غاتون معاہدہ کرینن، داوخت آ 22 ہزار ورناک تربیت نا دوئی کننگ کن تینا رجسٹریشن ءِ کرفینو۔ داخیال آتا درشانی ءِ او پریس حوال اٹی کرے۔ نگران صوبائی وزیرخزانہ و مال امجد رشید پارےکہ حکومت بلوچستان اٹی بےروزگاری نا چٹفنگ کن ورناتے ٹیکنیکل تربیت نا فراوانی نا بناءِ کننگ انگ ءِ ہرانا مسخت ورناتے چندی بشخ آتیٹی کسبکار جوڑ کرسا پبلک پرائیویٹ پارٹنر شپ انا رداٹ روزگار نا وارخواہی ودی کرسا اوفتے روزگارنا فراوانی ءِ ممکن کروئی ءِ۔ وزیراعظم پاکستان نا کنڈآن ورناتے کسبکار کننگ کن گام گیج کننگا و پیوپانا توسط اٹ ہرسال ورناتے پیشن نا ملک روزگارکن گدریفنگ انگ ءِ و ننا ملک اٹی ہرسال گریجویٹ تعلیمی ادارہ غاتیان فارغ مننگ ءُ نن تینا چناتے ڈگری اتون اوار اوار چندی بشخ آتیٹی کسبکاری ہیل ترسا تربیت فراوان کروئی ءِ تانکہ اوفتے نوکری ملنگ کے۔ کوئٹہ نا 10 تعلیمی ادارہ ہرافتے ٹی سائنس کالج، ڈگری کالج، پولی ٹیکنک کالج، موسیٰ کالج تون اوار ایلو تعلیمی ادارہ غاتون معاہدہ نا دستاویز آتیادستخط کرینو و دا تعلیمی ادارہ غاتا 22 ہزار ورناک کسبکاری نا تربیت دوئی کننگ کن تینا رجسٹریشن ءِ کرفینو۔
