پیپلزپارٹی نا مقبولیت اٹ ترندی اٹ ودکی مننگ ءِ و بروک آ وخت پیپلزپارٹی ناءِ، پاکستان پیپلزپارٹی زالبول ونگ بلوچستان نا صدر غزالہ گولہ و جنرل سیکرٹری زرینہ زہری

کوئٹہ۔ 01 دسمبر(اے پی پی)پاکستان پیپلزپارٹی زالبول ونگ بلوچستان نا صدر غزالہ گولہ و جنرل سیکرٹری زرینہ زہری ئسک پیپلزپارٹی نا یوم تاسیس نا وخت آ کوئٹہ ٹی جلسہ نا سرسہبی آ پارٹی سرکڑدہ و پارٹی راہشون و کارندہ غاتے مبارکبادی ترساپارینو کہ پیپلزپارٹی نا مقبولیت اٹ ترندی اٹ ودکی مننگ ءِ و بروک آ وخت پیپلزپارٹی ناءِ۔ داڑے جاری مروک  تینا اسہ اسیجائی بیان اسے ٹی اوفک پاریر کہ پیپلزپارٹی نا تاریخ جہد و قربانی تیان پُرتموک ءِ پارٹی راہشون و سرکڑدہ غاک ہردور اٹی قربانی تسر، زندان کاٹار، سختی تے سگار و جون تے ندر کرری ہندا سوب ءِ کہ اینو پیپلزپارٹی تناو درخت اس جوڑ مرسا ملک اٹی نیزگار مزور، ہاری بزغر آتیکن شونہالی نا نوید اس اتسا بننگ ءِ ہر دور اٹ پیپلزپارٹی نیزگار الس نا بے پرخ خذمت ءِ کرینے ہندا سوب ءِ کہ مدام الس پیپلزپارٹی ءِ سوگو ہُننگ خواہک۔ اوپارے کہ کوئٹہ ٹی یوم تاسیس نا وخت آ سرسہب جلسہ نا اڈتننگ آ پاکستان پیپلزپارٹی نا صوبائی، ضلعی و ونگ آتا عہدیدار و کارندہ غاک مبارکباد نا حقدار  ءُ۔ اوفک پاریر کہ بلوچستان نا الس اٹ کوئٹہ ٹی مروک آ جسلہ ٹی پبی بشخ ہلسا داہیت ءِ پک کرینو کہ پاکستان پیپلزپارٹی نیزگار الس نا است آتیٹی رہینگک ہرادے اوفتااست آن کشنگ کس اسے نا وس انا ہیت اس اف، انشاء اللہ بروک آ گچین کاری تیٹی پاکستان پیپلزپارٹی اسہ بھلو پارلیمانی جماعت اس جوڑ مرسا مون آبریک۔